Chief Minister Lalduhoma hovin nimin khan Minister B. Lalchhanzova enkawl department-te hnathawh ennawnna (review meeting) neih a ni.
Secretariat Conference Hall-a neihah chief minister chuan review meeting hi thil dik lo zawng hrim hrima buatsaih an nih loh thu sawiin, “Kan harsatna leh kan mamawh te, chak zawk leh tha zawka hna kan thawh theih nana inrawnkhawmna te a ni zawk. Supply department leh revenue department hnate hi a hautak a, an pawimawh si a, thawktute pawh inpe taka thawk turin kan beisei che u a. Supply lam hian ration card dik leh rintlak tak neih lo tum ula, sorkar document pawimawh takah chantir kan duh a ni,” a ti.
Review meeting minute hi an bawhzui tha em tih an ngaihven leh dawn thu sawiin chief minister chuan, an thil sawihote tha takin bawhzui turin a chah.
Minister B. Lalchhanzova chuan chief minister chungah lawmthu a sawiin, kum khat chhunga a department-te hmalakna lian zualte tar lan niin, sawihona neih zel a ni.
Food, Civil Supplies & Consumers Affairs Department Hmalakna Thenkhat:
- Card var neiten a man to va buhfai an lei atangin sawrkarin thla tin Rs. 3.84 crore vel a hum thei.
- LPG Home Delivery hi Serchhip khawpuiah tha taka kalpui a ni tawh a, district capital dangah pawh bultan tawh an ni. Aizawl veng 29 ah kalpui tawh niin veng 53 dangah a then lai kalpui a ni. LPG Distributors zawng zawngten kum thar atangin veng pahnihah home delivery an kalpui belh leh vek ang. Zothan Indane chuan an operation area-ah home delivery hi an kalpui vek tawh thung.
- Monsoon stock tha taka kalpui a nih avangin kuminah ruahtui tla tamin rei mah se, buaina engmah a thleng lo va. nakkum monsoon stock tur hi January thla atanga kalpui tan leh tur a ni.
- Buhfai phurtu contractor hi main route ah 55 leh district route ah 108 an awm mek a. A phurh manah hian Main route ah April – December, 2024 chhungin Rs. 2503.75 lakh leh district route ah Rs. 2047.10 lakh sen tawh a ni. NFSA buhfai phurh nan hian central chuan quintal khatah Rs. 105 zel a rawn tum thin.
Land Revenue & Settlement Hmalakna Thenkhat:
- Kumin November 5-a chief minister-in a hawn, e-ram chu Common Service Centre atanga dawr theih tura tihfel thawkhat a ni tawh a. Kum thar atang chuan uar taka he application hi hman an tum.
- LSC nei kher lo va ram neitu nihna dan RoR (record of right) department-in a duang mek. Record of Right computerize theih an neih zawng zawng (3,59,331) chu an computerised vek tawh a, digitally signed property card 1,155 an pe chhuak (issue) tawh. Cadastral survey an neih tawhna, geo reference nei fel vek, Unique Land Parcel Indentification Number (ULPIN) an pek theih tawh hi 94,154 a ni.
- Cadastral Survey kalpui a nih hmaa survey lo neih tawhna ram te kha cadastral survey neih nawn leh vek a ngai. Aizawl, Lunglei, Champhai leh Serchhip district te resurvey fel tawh a ni. Kolasib, Mamit leh Saitual resurvey fund nghah an nghak mek.
- Land valuation rate hi kum 10 liam taa siam a ni tawh a, ngaihtuahna thar an nei mek.
- Stamp & Registration fee atang hian tun sorkar kum kal mekah November thlengin Rs. 8 .58 crore hmuh tawh a ni.