Aizawl: Fire & Emergency Services Department-in mipuite tana awlsam zawka insak dawna ‘No Objection Certificate (NOC)’ dilna, online-a dilna tur portal chu Home Minister K Sapdanga’n nimin khan a pisa-ah a tlangzarh.
K Sapdanga chuan insak dawna Fire NOC online-a a dilna portal siam tak chu department tan ni lovin mipui tan a ni a, mipui tan awlsamna siamsakin thil pawimawh tak a ni dawn, a ti.
Portal tlangzarhna hi Home Secretary Vanlalmawia chuan kaihruaiin, Fire & Emergency Services Director Lalthafamkima Jongte bakah Home Department officer eng emaw zat an tel bawk.
Portal tlangzarh tak hi www.fsonline.mizoram.gov.in tih a ni a, ICT department kutchhuak a ni.
- AMC Regulations 2012 Clause 5 (3)(ix) in a phut angin AMC area chhunga High Rise Rise Building (metre 15 aia sang) sa turte tan leh National Building Code 2016, Part IV (Fire & Life Safety) in Building a tarlan te tan Fire & Emergency Services Department, Mizoram atangin Fire NOC neih tur a ni.
- Hetiang in sa tur te chuan a dilna te hi an insak dan building plan te nan a hmun kalin an thehlut thin a. Chumi hnua Fire & Emergency Services in site inspection a neih hnua Provisional NOC hi an pe thin.
- NOC atan hian Mizoram sorkarin a duan angin FIRE NOC fee hi Residential Building atan Rs. 1.50 per sq metre (a tam berah Rs. 2000/- maximum) leh Non- Residential Building atan Rs. 3.00 per sq metre (a tam berah Rs. 3,000/- maximum) lak thin a ni.
- Diltuten in an sak zawha Final NOC hi dilna an thehlut leh thin a, department-in kangthelhna hmanrua dah ngai an tarlante an dah leh dah loh an endik hnua Final NOC hi an pe chhuah thin a ni.
- Portal tlangzarh taka hian hengte hi a hmuna kal ngai lovin online in dilna hi www.fsonline.mizoram.gov.in ah theh luh thei a ni tawh dawn a ni.