Aizawl: India rama state leh union territory zawng zawng thirsakawra fang chhuak rang ber record siamtu, Vanlallawmzuala Varte (Lz Varte), Mission Veng hnenah nimin khan Synod Conference Centre-ah India Book of Record hlan a ni.
‘Ride to Clean Air’ tih thupuia hmanga boruak chhe mek laka invenna dan tur leh hmalak dan tur auchhuahpuia India ram hmun hrang hrang fangchhuak, Lz Varte hi India Book of Record aiawhin Tapan Datta chuan a hlan a. Mizo zinga India Book of Record-a lakluh hmasakber a ni.
Lz Varte hi he hunah hian khawvela paragliding pilot naupang bera International Book of Records-in, ‘Youngest Certified Paragliding Pilot’ nihna an pek, Samuel Lalbiakhlua, Saitual pawhin a tawiawm.
India rama state zawng zawng leh UT a tlawh kim vek nan hian LZ Varte hian km. 17,045 vel a inrap kal a, ni 285 a thang a ni.
Ni khata a tlan thui ber chu km 207.82 a ni a, Lucknow atanga Badlapui, Uttar Pradesh kalkawnga a tlanna a ni a. A tlan chak ber West Bengal-a Kurseong atanga Darjeeling a ni a, darkar khata km. 68.8 tlan ang a ni.
January, 2024 khan km 500 vel chauh a tlan hman a, February – April, 2024 khan km 2000 chuang thla tin khalh a ni a, May – November, 2024 khan thla tin chawhrualin km 1278 vel tlan ang a ni tawh.