Autonomous District Council (ADC) pathum huam chhung district pahnih tih loh Mizoram district pakuaa village council leh local council inthlanpui atan February 12, 2025 ruat a nih thu State Election Commissioner Dr H Lalthlangliana’n a puang.
Ningani khan a pisa-ah Dr H Lalthlangliana chuan chanchinbumite hmaah puangin ADC pathum huam chhung district pahnih, Lawngtlai leh Siaha district tih loh, district dang zawngah village council leh local council inthlan hun atan February 12, 2025 ruat a nih thu a sawi a. VC leh LC inthlanpui hun puan a nih rualin district pakuaah Model Code of Conduct hman nghal a nih thu a puang bawk.
He inthlana chuh tumte tan January 23, 2025 tlai dar 3 thleng hming pek theih a ni ang a, inhnukdawk duhte tan tun thla ni 24 thleng hun hawn a ni a. Hemi ni vek hian inthlan chuh tumte endik an ni ang.
February 12 zing dar 7 atanga tlai dar 4 thleng vote thlak a ni ang a, hemi zan vek, zan dar 7 atangin vote chhiar a ni nghal dawn bawk a, February 14-ah VC leh LC sorkar din fel tur a ni bawk.
February 19, 2025 khian district pakua-a village council leh local vouncil term chu a tawp dawn a. VC leh LC term pawh tawi leh pawh sei chu SEC thu ni lovin sorkar thu a nih thu Dr H Lalthlangliana’n sawiin, “Dan angin inthlan chu a term tawp hmaa neih tur a nih angin, SEC chuan inthlan hi a huaihawt mai dawn a ni,” a ti.
Tun tum VC leh LC inthlan neih turah hian VC 544, awmah seat 2,416 a awm a, village council hnuaiah hian hmeichhe seat reserve 613 a awm a ni.
Aizawl Municipal Corporation leh Lunglei Municipal Council hnuaia LC 111 awmah seat 723 a awm a, a pum puiah vote nei mi 4,39,409 an awm a. Local council hnuaiah hmeichhe seat 195 a awm bawk.
AMC huam chhungah kumin January thla khan local council thar pahnih – Bawngkawn West leh Tlangnuam West-te pian belh lehin tun tum local council inthlanpuiah hian local council 87 a awm dawn ta a ni.