Aizawl: Hachhek bialtu MLA Robert Romawia Royte chuan Mamit Luangpawl tlanga Mamit Residential School behchhana Phullem Football Ground sak zawh thar a tlawh.
Inrinnia a tlawhnaah hian sports minister hlui, Robert Romawia Royte chuan Mizorama district ngaihtuah bik ngai a, sorkar laiin a thlan ‘Aspirational district’ awm chhun, Mamit district-a MNF sorkarin zirna leh infiamna ruhrel tha tak tak a lo din chu, sorkar laipui leh Mamit district mipuite duh dan tihhlawhtlinna a nih thu a sawi.
MNF Thalai President ni bawk chuan, kum 2018-a MNF a sorkar leh hmalam khan Mamit district-ah infiamna hmunhma tha a awm ve lo va, tunah erawh chuan hmun tina thalaite mamawh em em football phullem field pawh Mamit district hmun pangaah siam zawh tawh niin, zana inkhelh theiha light system nei tha volleyball court leh Basketball court-te pawh Mamit district khaw hrang hrangin an nei ta chu lawmawm a tih thu leh, an hmang tangkai avanga hma an sawn phah thu a sawi.
Robert Romawia Royte chuan Mamit district chu Mizorama district hmasawn chak leh hmasawnna thlen theihna anih angin sorkar laipui duh danin state sorkar pawhin a ngaihsak tura a ngaih thu a sawi bawk.