Aizawl: Association for Voluntary Blood Donation (AVBD), MSACS leh blood bank hrang hrangin nikum December thla chhunga Krismas Pual Thisen Pek rûnpui an buatsaihah Aizawl district bika blood bank pathumah thisen unit 1,278 pek a ni.
Krismas Pual Thisen Pek rûnpuiah khan Civil Hospital, Aizawl blood bank-ah mi 944-in thisen an pe a, Synod Hospital, Durtlang blood bank tan mi 118-in an pe a, ZMC blood bank-ah mi 216-in an pe bawk a. Thisen pek zawng zawng hi unit 1,278 niin, thisen petute hi mipa 1,032 leh hmeichhia 246 an ni.
AVBD hruaitute chuan thisen pek rûnpui an buatsaiha thisen pe tura an ngenna leh sawmna mi tam takin ngai pawimawha, Krismas pualin thisen an pe a, thisen petute inpekna leh an tlawmngaihnate chu ropui an tih thu an sawi a, mi tana an inpekna hi mi dang tan malsawmna a nih thu leh dam lo tam takin damna an chah phah avangin, thisen petute chungah lawmthu an sawi.
AVBD hruaitute chuan kum tawp lam, Krismas velah pawl hrang hrangin tih tur an ngah a. Kum thar tir lam. January thla hi thisen pe thin pawl hrang hrangte hruaitu insiksawi lai, kum khat chhunga hmalakna tur hrang hrangte duan hun lai a nih avangin tih tur neuh neuh tam lai a ni bawk a. Chuvang chuan, kum tin January thla leh December thlaah thisen pek a tlahniam thin a, pawl hminga thisen pek a tlem zual thin tih an sawi a. Tun kum thar, 2025 January thlaah pawh thisen pek a tlahniam hle a, thla dang zawng aiin pawl hminga thisen pe an tlem em em a. Blood bank hrang hrangte pawhin blood donation camp neihna tur an nei mang lo tih an sawi a. Thisen mamawh an awm pawhin blood bank-a dah khawl sa lak tur a awm mang lo a, thisen mamawhten petu tur an zawn a ngaih tlangpui avangin kohhran thalai pawlte leh NGO dangte pawh thisen pe turin an ngen a ni.