- Dr. C. Lalrampana
A KAMKÊUNA
Mi chu a talent, a thawhrimna, a huaisenna leh eng thil pawh ti thei tura paukhauhna leh tumruhna (grit) a neih atangin VIP a ni thei a ni. IAS, IPS, Engineer emaw Doctor emaw chu degree an neih hnuah VIP an ni a, chu chuan VIP a nihtir a ni. VIP hi “mi pawimawh tak” tih sawifiahna mai a ni. Mi pakhat, a dinhmun, a nghawng, a pawimawhna avanga enkawlna bik pek a nihna a kãwk a ni. Entîr nân, mi hmingthang emaw, nghawng nei tak emaw chu mi pangngai aiin an enkawl tha zâwk thin a ni. A aia sang leh chungnung zawk VVIP hi “mi pawimawh bik lehzual tak tak” tihnaah ngai ta ila. VIP pangngai aia pawimawh zawkte sawina atan hman a ni. VVIP-te hi socioeconomic rank sang tak nei, huhang (influence) sang tak nei, emaw thil lei theihna sang tak neite an ni fo thin. A châng chuan mi pawimawh tak tak V.I.P. emaw V.V.I.P. tih thumal pawh hman a ni a, a bik takin socioeconomic rank sang tak tak emaw, thil lei theihna nei VIP-te sawina atan pawh hman a ni.
TUTE NGE V.I.P. CHU?
India sawrkar hnuaia V.I.P-te chu: President of India; Prime Minister of India; Leader of Opposition; Member of Parliaments; Member of Legislative Assembly; Chief Ministers & Ex Chief Ministers; Governors & Lt. Governors; army Chief, Navy Chief, Air Chief Marshal; Chief Justice; Ex MLAs; Ex MPs leh Sakhaw puithiam leh political lama nghawng nei mi thenkhat sawrkarin a ruat bikte an ni. Heng mite hian enkawlna tha chuangchuang bik an dawng thin. Mizoram sawrkar hnuaia VIP-te chu:,Governor ; Chief Minister ; Judges of High Court; Speaker, State Legislative Assembly ; Cabinet Ministers ; Leader of Opposition in Legislative Assembly Deputy Chief Whip ; Vice Chairman (SPB) ; Deputy Speaker of State Legislative Assembly Minister of State, Chief Secretary, (Govt. of Mizoram) ; Director General of Police ; Advocate General ; State Election Commissioner ; Chairman, Aizawl Municipal Council (AMC) ; Chairman Mizoram Public Service Commission (MPSC) ; State Chief Information Commissioner-te an ni. Heng mite hian VIP Light êngsen (red light) an chhi thei. Heng bakah hian êng pâwl (Blue Light with Flasher) chhi thei Mizoram chhungah an awm a, chungte chu: Vice Chancellor of University; Principal Secretaries/Commissioner/Secretaries of Govt. of Mizoram; Deputy Commissioner; Chairman Autonomous District Council; District & Session Judges ; Police Officers SP Level atanga Addl. D.G. Blue Light with Flasher on Jurisdiction-ah: Ambulance; Police Escorts; Patrol Cars.
A chunga tarlante bakah khian Sawrkarin an anpuia a dahte pawhin an rank puite chhit ang VIP Light chhit phal a ni a, VIP-te an chuan loh chuan light hi a khuhna dumin khuh tur a ni, official duty-ah chauh chhit tur. VIP light chhi theite hian Sawrkar motor an kawl laiah chauh chhit tur, an private motor-ah dah phal a ni lo. VIP light chhit tur bituk ang nilo chhite chu dan angin hrem theih an ni.
V.I.P DANGTE CHU?
Sawrkar hnuaia mi pawimawh tak tak awm khawm V.I.P.-te bakah mi pawimawh tak tak dang, ram leh hnam dinchhuahna bulpui ber an la awm a, chungte chu kuthnathawktute an ni. Kuthnathawktute hi kan ram leh hnam dinchhuahna hnukpui ber an ni. Hei vang hian tuna kan PM Narendra Modi pawh hian Pradhan Mantri Kisan Samman Nidhi (PM-KISAN scheme) a kalpui mek a ni. He ruahmanna hian lo neitute leh kuthnawktute harsatna tamtak sukiangin chhungkaw tamtak a khai chhuak tawh a, a khai chhuak mek zel bawk. He ruahmanna entawn ni awm tak hian ZPM pawh hian kum 2023 inthlan dawn khan “Kuthnathawktute hi kan VIP a ni” tih chu ãu hla berah an nei a nih kha! An sawrkar hnuah pawh he an ãu hla hi an la chhamphual zauh zauh thin niin a lang. Mahse, sawrkarin V.I.P. & V.V.I.P.-te a enkawl dan leh vohbik dan ang hian ZPM Ministry hian a V.I.P. kuthnathawktute hi a duatin a enkawl tha ve lem lo hle niin a lang. State kan nih hnu ringawtah pawh vawi 9 zet MLA thlanna kan neileh tawh. Inthlan dawn apiangin political party hrang hrangte’n kuthnathawktute an ngai pawimawh thar hluai thin. An tih theih loh tur pui pui tiamin an insawi baa phurrit an insiamchawp thin. Mahse, an han sawrkar a, an thutiam an hlenleh tak tak ngai si lo. ZPM pawh hian kum 2023 Nov. thlaa inthlan beihpui thlak lai khan thlai thar chili hmarcha, sawhthing, aieng leh hmunphiah lei tur leh thlai dang pawh a tahtawla lei chho zel turin an intiam a. An han sawrkar ta chenga hmunphiah an lei thei lo nghal pang a. Hmunphiah chingtute an buaiin an mangang hle a nih kha? Khawzawl District Sialhawk khuaa lakhuihthei chingtute chuan nikum khan lakhuihthei quintal 13000 an thar chhuak a, sawrkar hmasa khan a hralhna s ngaihtuahsak avangin hlawk takin an hralh zo vek thei a. Kuminah quintal 9000 an thar a, mahse, ZPM sawrkar tharin a hralhna a ngaihtuahsak ve theih loh vang nge a hralhna lamah harsatna an tawh tãk avangin quintal 4000 zet chu a tawih ral ta a ni. Hei vang hian Mizoram sawrkar thar V.I.P. kuthnathawktute chu an beidawngin an mangang hle a; chhungkaw 250 vel chuan lakhuihthei chin bansan an tum ta a ni. Kumpui lingketa a thawh Hana zawng zawng kha a thlawnin a luang rual tihna a ni a, sawrkar hian zangnadawmna tlem tal pek mai âwm tak a ni. Sawrkarin a V.I.P kuthnathawktute a ngaihsak lohzia a tak ngeia hmuh tur a awm mek hi a pawi takzet thin a ni. Kuthnathawktute hian châng dang kanin thlai dang ching kualleh thin mah se, hetiang bawka harsatna hi an tawkleh thin dawn a nih chuan beidawnna ruam, lungngaihna chirhdupah an tla lut leh mai dawn a, din chhuah tih hun reng an nei ngai lovang. Sawrkarna chelhtu apiang hian kuthnathawktute leh miretheite dinchhuahna tak tak hi an hlãu nge, nun nuam tak (luxurious life) an chen ve hi an phal ngang lo tihna em ni zawk?
A TLÃNGKAWMNA
Sawrkar milian (burocrate) zinga V.I.P. & V.V.I.P-te nunkawng lamtluang zawh mek nawm dan leh awlsam dante ngaihtuah hian kan ram leh hnam V.I.P. & V.V.I.P. diktak zawk kuthnathawktute nunkawng lamtluang zawh mek dan erawh hi chu a lungchhiat thlak takzet a ni. Kan ram politician-hote hian kuthnathawktute hnenah tûm, sawhthing, hmarcha, hmunphiah, aieng, cardamom, palm oil, grape, tomato leh thlai chihrang hrang ching uar turin an hrilh chamchi thin. Thuawih takin an ha’n ching a, a hralhna (marketing) an ngaihtuahpui leh thin si loh avangin vawi tam tak beidawngin an siam tawh a ni. MNF Ministry hmasa lam kha niin ka hria. Mizoram chhim lam Damdep phai zawlah sawn aieng quintal tam tak chu a hralhna a awm loh avan¨gin truck lian chiin an chil pherh zeizui mai a, a hriak lah chu kawngah a luang tle niar nuar a, a kãwi zeizui mai. A van lungchhiatthlak thin tehreng êm! Tuna ZPM sawrkarah pawh hian hmunchhiah leisak theih loh te, lakhuihthei hralhna awm lova dah tawihte leh tui supply harsa leh kawlphetha awm zing lutuk te, alkatra tel lova kawng khuar hnawh mam ringawtte hi an kalphung thar sawi thin chu em ni ang le? V.I.P. & V.V.I.P. pawimawh ber kuthnathawktute hian sawrkarah rinna an nghat ngam tawh lova an mangang mek a ni tih a lang chiang hle. Chuvangin, ni 100 chhunga an tih tur “100 days programmes” an hlen tawh bawk a, thlai dang dang pawh dah tawih mai mai a nih tawh loh nan leh an V.I.P. chhuan êm êmte hi an mangan fo tawh loh nan sawrkar hian engkim hi kim takin ngaihtuahin tihtakzetin hma la thin se alawmawm ngawt ang.