Aizawl: Vairengte leh Sairang inkar kawng chhe lutuk siam that a nih hma chuan bungraw phurtu truck enkawltute chuan January 23, 2025 atangin an tlan ngam dawn tawh lo tih a puang.
Thawhtanni khan Mizoram Truck Owners’ Association (MTOA) leh Mizoram Truck Drivers’ Association (MTDA) te chuan joint meeting neiin Mizoram châk lakna kawng, Vairengte leh Sairang inkar chhe lutuk chungchang an ngaihtuah a. Tun dinhmunah kawng chhia avangin an truck-te a chhe nasa em em a. A khalhtute nunna atan pawha hlauhawm tak hial avangin tun kar Ningani atangin an tlan ngam dawn lo tih an puang.
MTOA leh MTDA hruaitute chuan, “Truck tlan ngama kawng hi siam a nih hma chuan Mizoram chhungah bungraw phur truck engmah a tlan lo vang,” tiin, eibar leh ni tin mamawhah harsatna an tawk a nih chuan mipuite hriatthiam an ngen a ni.