February 20, 2025 atangin Mizoram sorkarin sawhthing lei a kalpui tan dawn tawh avangin sawhthing chingtute lo inbuatsaih turin Argiculture Minister PC Vanlalruata’n a chah.
Thawhtannia ZPM pisa-a chhung inkhawmah agriculture minister chuan ZPM sorkar chu tluang takin kum khat zet Pathian hruainain an sorkar chhung hian sorkar kal tawhte kihhnawk tam tak an thian fai mek a. Sorkar kal tawhte khan an flagship programme chu term tawp dawn lamah an buaipui chauh thin a, inthlan dawna politics khelh nante pawh an hmang fo a. Kalphung thar mipui sorkar erawh chuan an policy-te hi term tawp dawna politics khelh nan hman an tum ve lo va. Bana kaih – Hand Holding Scheme hmangin kuthnathawktute khaichhuah an tum a, thlai pali – sawhthing, aieng, hmarcha leh hmunphiah lei turin an inbuatsaih chho mek a. Hmunphiah bikah phei chuan empanelled buyer pasarih an thlang fel tawh tih a sawi.
PC Vanlalruata chuan VC inthlan hma ngeia sawhthing lei tumin ruahmanna siam ni mah se, VC inthlan hun a rawn puan hma tak avangin VC inthlan hma chuan an lei hman dawn ta lo tih sawiin, an hun ruat, February 20, 2025-ah erawh sawhthing an lei tan ngei dawn tiin, sawhthing chingtute pawh lo inbuatsaih turin a chah.
Sorkar kal tawhteah kut hnathawktute an beidawng thin tih sawiin agriculture minister chuan, “Kalphung thar mipui sorkar hnuaiah erawh thlai thar lei hi a takin kan kalpui tawh dawn a, nikum lamah Rs vbc 110 kan nei tawh a, kumin budget-ah Rs vbc 200 kan dah leh a; chuvangin, sorkar thar chuan inthlan laia kan lo au hla ang ngeiin kan policy kan tihhlawh tling dawn a, Zoram mipuite pawhin hei hi min hriatpui se kan duh a ni,” a ti.
PC Vanlalruata chuan sorkar kal tawhte khan an sorkar lai ngeia LC/VC neih a finthlak thu an lo sawi thin chu thu dik tak a ni tih sawiin, Mizoram mipuite pawh sorkar lai ngei LC/VC candidate lo vote tling turin a sawm a ni.