Aizawl: Women & Child Development (WCD) Department buatsaihin nimin khan Child Welfare Committee (CWC), Juvenile Justice Board (JJB)-a chairperson leh member tharte bakah District Child Protection Officer (DCPO)-te tan induction training chu I&PR Conference Hall-ah neih a ni a. Jimmy Laltlanmawia, Chairperson, Mizoram State Commission for Protection of Child Rights (MSCPCR) chuan khuallian niin a hmanpui.
Jimmy Laltlanmawia chuan he mipui sorkarah hian naupang te tan pawh hmun a awm tih sawiin, naupangte an lo thanlen a, ram leh hnam leh khawtlang, kohhran tana mi chenfakawm ni tura tanpuia, naupang dan nen a inrem lo leh naupang venhim ngai leh chhanchhuah ngai dinhmun a ding te tan CWC leh JJB Chairperson leh member lak thar te chu in tat hriama, theih tawp chhuah turin a chah.
Jimmy Laltlanmawia chuan kum 2011 chhiarpuiin a tarlan angin, Mizoramah hian naupang kum 18 hnuai lam hi 40% lai an ni a, chungte hmakhua leh an lo thanlen a khua leh tui tha ni tura kaihhruai leh venhim chu Mizoram sorkar chuan a ngai pawimawh hle tih a sawi bawk.