Aizawl: Mizoram Legislative Assembly Speaker Lalbiakzama chuan India danpui 8th Schedule-a Mizo tawng a tel ve theih nan theihtawp chhuahpui turin speaker leh ram hruaitu rualte a ngen.
All India Presiding Officers’ Conference 85-na, Patna, Bihar-a neih chu nimin khan chhunzawm a ni a. Nimina inkhawmah hian Mizoram Assembly Speaker Lalbiakzama chuan India ram chu ‘Mother of Democracy’ ti hiala sawi hlawh, hnam leh tawng chi hrang hrang infinkhawm ‘Unity in the midst of diversity’ lo tih theih phahna ram danpui, Constitution duangtute an fakawm tih a sawi.
Lalbiakzama chuan India-in constitution tha leh hlu tak a neih chu vawn him zel a pawimawh tih a sawi a. India danpui 8th Schedule-a Mizo tawng a telh chu a pawimawh avangin a tel ve theih nan theihtawp chhuahpui turin speaker leh ram hruaitu rualte a ngen.
Assembly speaker chuan sakhaw zalenna chungchangah pawh constitution-in a tar lan anga khua leh tuiten an duh zawng sakhua an zui zel theihna tura danpui vawn him kawngah tan la zel turin kalkhawmte a ngen a. Hetihrual hian sakhaw zalenna ram ropui tia sawi ram chhung ngeia inrahbehna awm thin chu pawi a tih thu sawiin, December 29, 2024-a Howrah, Kolkata, West Bengal-a christian minority-te chunga thil thleng chungchang West Bengal Speaker Biman Banerjee hnena a lehkha ziak bawhzuia rang taka hma a lo lak avangin lawmthu a sawi a. Inlungrual taka awm tlang dial dial turin kalkhawmte a sawm.