Aizawl: Mizoram Police chuan nimin khan an din champha vawi 53-na chu Mizoram Police hnuaia unit hrang hrangah lawm a ni.
Mizoram Police Raising Day pualin Mizoram Police hnuaia unit thenkhat chuan awareness programme, faina beihpui thlak leh thisen peten an lawm a ni.
A lawmna pui ber, Aizawl Khatla G.S. Arya Mess, PHQ-ah Mizoram DGP Anil Shukla, IPS, chuan thu sawiin Mizoram Police-in din champha an hmang thei chu lawmawm a tih thu a sawi a. Office leh thawktu hmasa chawl tawhte thawhrimna leh inpekna avanga tun dinhmun thleng thei a ni tih chu an chungah lawmthu a sawi a. Police-te hnathawh kawngah mipuin tha taka an thlawp thin chu an lawm hle tih sawiin, hun kal zelah thawhpui zel turin a sawm.
Shukla chuan hmarchhak rambuai karah Mizoram chu remna leh muanna tluangtling awmna a nih thu a sawi a. Tun hnai kum khat leh a chanve vel chhungin an chhehvela thil thleng vel karah, Mizoram chu remna leh muanna hmangin nghet takin a ding a. Remna leh muanna an neih mek chu a chhiat an phal tur a ni lo tih a sawi.
Ruihhlo do kawngah tan lak a tul hle tih sawiin Mizoram DGP chuan ruihhloin Mizoram a rûn mek a, thalai tam takin an thihpui mek chu titawp tur leh, ruihhlo ti thinte mai ni lo, a zuarte thlengin an do a ngai a, ruihhlo zuar leh tawlh thinte do kawngah tan an lak a ngai hle tih a sawi.
Inkhawmah hian Mizoram DGP Shukla chuan police hna thawk tha chawimawina – DGP Commendation Disc and Certificate chu mi 51 hnenah a hlan a. Union Home Minister’s Medal for Excellence in Investigation 2023 chu SI Lalnuntluanga, Lunglei Police Station hnenah a hlan a. Best Police Station Award 2024 chu Vaivakawn Police Station hnenah a hlan bawk.