Kum sawm chhung zet lemchan lam chawlhsan tawh Cameron Diaz chuan lemchan lama let leh turin a inpeih leh thu a sawi.
Netflix-a a film thar ‘Back in Action’ tihlarna tura an kawmnaah he thu hi Diaz chuan sawiin, The Mask movie siam leh turah pawh a tul chuan a inpeih thu a sawi a ni.
Kum 1994 a tihchhuah Jim Carrrey nena an film hit tak mai hi Diaz-i lar tanna pakhat a ni a, kha movie-ah khan hnehsawh taka inlanin, a hming a chher zui phah hle.
Hetih lai hian The Mask siam thar leh tumna awmah hian a changtu turte thlan an la ni lova sawi a ni a, Cameron Diaz chuan Jim Carrey nena chang dun tura an ti a nih chuan a inpeih leh reng thu sawiin, midang erawh chanpui tumna a nei chuang lo niin a sawi.
Netflix-a a movie thar ‘Back in Action’ hi a lar chhoh tan leh em avangin film puitling danga chang tura duhtu an thahnem leh hle tawh a, Diaz erawh chuan uluk taka ngaihtuahna hman a tum thu a sawi thung.
Kum 2000-a tihchhuah ‘Charlie’s Angels’ pawh chan chhunzawm tumna a awm a nih chuan a inpeih niin a sawi a, khami film-a a chanpui Drew Barrymore leh Lucy Liu-te pawh a biak tawh thu leh anni an remchan ve ve chuan lemchan lama let leh a hnial loh thu sawiin, film thar dang erawh chu chang tura a rilru a siam rih lo thu a sawi lang bawk.