Borussia Dortmund chuan Thawhlehni zana Champions League-a Bologna an hneh loh hnuah an head coach Nuri Sahin an bân.
German club hi thlasik chawlh an hman zawh hnua intihsiakna hrang hranga an inlan tawh vawi liah an tlawm vek.
Season hmasaa Champions League finalist hi Thawhlehni zana Italian club laka 2-1-a an tlawm kha tun season-a an vawi thum tlawmna a ni tawh.
An tlawm avang hian knockout stage khel tura playoff khelh ngai lo tur ni tur chuan an khelh hnuhnung ber turah Dortmund hian Shakhtar Donetsk chu an hneh ngei a ngaih dawn bakah mi dang result an ngaihchan a ngaih phah dawn.
Bundesliga-ah pawh kuminah vawi thum an chak loh zawn tawh a, 10-naah awmin point sarih zetin season leha Champions League khel pha thei tur, palina chin an hlat tawh.
Kum 36 mi, Sahin-a hi a khelh laiin vawi hnih an club-ah hian a lo khel tawh a. “Vanduaithlak takin Borussia Dortmund-in tum a neih chu tun season-ah hian kan puitlinsak thei lo va. He club special tak hi an kal zelna turah duhsakna ka hlan,” a ti.
Sahin-a hi June, 2024 khan Dortmund boss atan ruat niin Champions League final-a Real Madrid hneh lohpuitu, Edin Terzic a thlak.
Coach a nih hma hian Terzic-a assistant-ah hian kum 2024 kumtir atang khan Sven Bender nen an awm thin.
“Nuri Sahin-a leh a hna thawhte hi kan ngaihlu a. Kan tum tihlawhtling turin rei tak kan thawhho kan inbeisei thin,” tiin Dortmund sporting director Lars Ricken chuan a sawi.
“He thutlukna hi ka mi mal takin hrehawm ka ti a; mahse, Bologna kan khelh hnuah kha chuan tih loh theih loh a ni,” a ti.