Aizawl: Chhawmdawl ngaite chhawmdawl tura pawl din, People United in Music with a Purpose (PUMP) chuan Mizoram State Cancer Institute tan cheng nuai thum chuang a hlan.
PUMP hian puih ngaite puihna sumtuakna atan charity concert a nei thin a. Cable TV kaltlanga live programme siam bakah live concert neiin a hmunah bawm dawhin sum an khawn thin a. Heng huna thawkchhuak zaithiam leh musician-te hian engmah beisei let nei loin an tha an thawh thin a ni.
December, 2024 khan MSCI tan hian charity concert tum thum neiin heta an sum hmuh zawng zawng Rs 3,10,300 hi Thawhlehni khan PUMP hruaitute hian an hlan.
PUMP chuan tha thawhtute leh sum petu zawng zawngte hnenah lawmthu an sawi a ni.
Cancer Hospital Poor Fund atan hian PUMP chuan January, 2020 khan sum tuaksakin Rs. 4,58,502 a lo hlan tawh bawk.