Aizawl: MJA Lunglei District chuan Lunglei Press Club-ah kum 2025 atana inhlan tharna leh annual conference an hmang a. Lunglei District Information & Public Relations Officer C. Lalhruaitluanga’n a hmanpui.
MJA Lunglei District inhlan tharna leh annual conference hi Vice President PC Lalduhthlanga’n a kaihruai a. UPC (NEI) Lunglei District Secretary Rev. PC Lalfakawma’n hunserh hmangin, fuihna thuchah a sawi a. Nikum December 2-a an member thi, Johan Lalhmunmawia, DDK Stringer sunna hun hman a nih bakah secretary leh treasurer report ngaihthlak a ni bawk a. Chawhnu lamah rorel inkhawm buatsaih niin zanriah an kil ho nghal bawk.
MJA Lunglei District hi ‘Lunglei Journalist Association (LJA)’ tiin kum 1972 khan din niin kum 2006 December 1 atang ‘MJA Lunglei District’ tiin kalpui tan a ni a. Tun dinhmunah member 18 an awm mek a ni.
Annual conference buatsaih hi Lungleia I&PR leh sawm bikten an telpui.