Aizawl: Kolasib Deputy Commissioner Robert C. Lalhmangaiha chuan Kolasib leh Kawnpui inkar kawng (National Highway 306) siamtu, NHIDCL hnuaia Balaji Construction-te chu ruahmanna awm tawh angin black topping hna March thla ral hmaa zo fel hman turin a chah.
Nilaini khan Koalsib DC Robert C Lalhmangaiha kaihhruaiin Kolasib leh Kawnpui inkar kawng siam mek chungchang sawihoin an thukhawm a. He lai kawng siamtu, NHIDCL hnuaia Balaji Construction-te chu ruahmanna awm tawh ang ngeiin kawngpui siam black topping hi March 31, 2025-a zo fel hman turin a chah a. Fur khaw chhia a lo thlen hma ngeia kawngpui siam hna hi zawh fel a nih loh chuan mipuite bakah a kawng siamtu company-te tan pawh harsatna lian zawk a awm thei dawn tih a hrilh.
DC chuan National Highway 306 chu Mizoram luhka pawimawh tak a nih angin Kolasib mipui mai ni lo, Mizoram pum mipuite tan ni tin mamawh chawkluhna kawng pawimawh tak a ni a, chumi chu hre reng chunga kawng siam hna hi chak zawka thawh a pawimawh thu sawiin, Balaji Company-te chu thawktu leh hmanrua pawh lak belh turin a chah nghal bawk.
He thutkhawmnaah hian Kolasib leh Kawnpui inkar kawngpui siam mekah inzawmkhawm pawl thenkhatten lungawi lohna an thlente chu an sawi ho nghal bawk a. DC Kolasib chuan he kawngpui siam mekah hian mipuite chu a siamtute tan harsatna siamsak lo tura chahin kawngpui tha tak siam a nih theih nan sorkar leh a siamtute chuan an theihtawp an chhuah a ni tih hriaa zaidawh taka awm turin a chah.
Kolasib DC chuan pawl anga lungawi lohna lantirna a awm pawn mipui leh khawtlang nunphung tibuai lo zawnga tih lan ni thei se tiin a ngen a. National highway dangchat zawnga hmalakna emaw, mipui nunphung tibuai zawnga hmalakna emaw awm lo se a duh thu a sawi bawk.
Thutkhawmnaah hian Kolasib DC leh SP bakah, Kolasib Addl. DC, NHIDCL leh Balaji Construction-a thawktute, Mizoram PWD lama thawktute, Sub-Hqrs YMA leh Joint Action Committee Mizoram Truck Owners’ Association aiawhte an tel a ni.