Chief Minister Lalduhoma chuan kalphung thar mipui sorkarin ram rorelnaa Pathian ram a thlen theih nan leh sorkar hmalaknain mipui tana hmasawnna tluantling a thlen theih nan, sorkar lai thawhpui thei tur LC/ VC sorkarin a mamawh tih a sawi.
Nilaini chawhma khan Thenzawl Vantawng Group YMA Hall-ah ZPM Thenzawl Block huam chhunga VC candidate tur puanna hun hman a ni a, he hun hmanpuitu, chief minister chuan LC/VC-te hi sorkar kut leh ke pawimawh tak an ni tih a sawi a. LC/VC tha nei veng leh khua chuan hmasawnna tam tak an khawtlang tan an chaw lut thin a, chutih laiin, opposition LC/VC-te zingah sorkar thawhpui hleithei lo an awm hian sorkar hmalaknain mipui a thleng zo lo fo thin niin a sawi.
Bialtu MLA ni bawk, Lalduhoma chuan ZPM party-in Pathian leh mipui duhsakna changin sorkarna kum khat zet an chelh ve ta a, hmasawnna hna thawh tak tak dawn chuan sorkar lai thawhpui thei LC/VC an pawimawhzia a takin an tawng chho mek tih sawiin, “Kan ram rorelnaa Pathian ram tun dinna tur leh hmasawnna mipui thleng phak kan neih theih nan sorkar thawhpui thei tur LC/VC kan mamawh hle a ni,” a ti.
LC/VC inthlanah sorkar lai party tan candidate thlan a har thin hle tih sawiin Lalduhoma chuan, “Mi tha tam tak leh candidate âwm tak tak an lo awm tawh vang leh rorel lai party thawhpui thei tur mi tha eng emaw zat an lo awm ve tawh vang a ni a. Chutiang dinhmun chu ZPM party pawhin kan tawng mek a ni,” tiin, candidate tur atana an ruat apiangte thahnemngai taka thawhpui turin Zoram dung leh vanga an lungrualpuite a ngen.
He hun hi ZPM Thenzawl Block President B. Lalhmangaiha’n a kaihruai a ni.