Aizawl: Inrinni khan Mizo Zirlai Pawl (MZP) chuan thuchhuah siamin scholarship thawh thumna (3rd installment) tur hi sorkar laipui Ministry of Tribal-in Mizoram sorkar hnenah pawisa an la rawn pek loh avangin sem theih a la nih loh thu an tar lang.
MZP tar lan danin, scholarship thawh thumna nghaktu zirlaite atangin zawhna an dawn nasat avangin, Mizoram Scholarship Board hotute thil awmdan Zirtawpni khan an zawt fiah a, “2nd Installment sem zawh a nih khan UC leh lehkha pawimawh tihfel ngaite thehluh nghal ni mah se, vawiin thlengin central lamin pawisa an la rawn pe thei lo niin an sawi a. Pawisa dawn a nih veleh sem nghal a ni ang, an ti,” tiin, zirlaite dawh thei taka nghak hram hram turin an ngen.
Post matric scholarship (2023-2024) hi zirlai 31,685-in an dil a. Zirlai 26,670 pek tawh an ni. La dawnglo zirlai 5,015 an awm mek a. Heng zinga zirlai 3,981 te chu sum awm veleh pek nghal tur an ni a. Zirlai 1,034 te pending mekin, zirlai 898 te erawh Aadhar seeding loh avang leh chhan dang dang avangin reject list-ah an awm thung.
Tun thlenga scholarship sem tawh hi a vaiin, Rs nuai 3,471.91 a ni a. Heng atanga 10% (Rs. 345.84 lakhs) hi Mizoram sorkarin a tum (state matching share) a ni.
FY 2023-2024 sem zawh la ni lo mah se, FY 2024-2025 hi National Scholarship Portal kaltlangin dilna nikum khan hawn a ni a. A hun pawh a tawp tawh a ni.
MZP chuan zirlaiten scholarship an dawn hma chuan, a tul angin a enzui zel dawn tih an tar lang bawk.