Aizawl: Aizawl West II bialtu MLA Lalnghinglova Hmar, Sports Minister chuan Mizoram sorkarin Aizawl West II bial chu a duat hle tih sawiin, kum khat chhung lekin Rs nuai 4,500 chuanga thuam turin pawisa a dah tawh tih a sawi.
Thawhtannia Vaivakawn YMA Conference Centre-a Aizawl West II biala ZPM Local Council Candidate-te inhmuh khawmna leh fuihna hun hmanpuitu, bialtu MLA Lalnghinglova chuan, tunah hian Tuikual South atanga Dinthar thleng kawngpui thar sial turin pawisa pek an ni tawh a, local council inthlan zawh veleh tender chhuah a nih tur thu leh January 7-a State Level SASCI meeting-ah report pek niin, he kawngpui hi ‘Aizawl West Outlet’ tia hming vuah a nih tur thu a sawi.
Tuikual South leh Dinthar thleng kawngpui thar sial tur hi administrative approval leh expenditure sanction hmuh a ni tawh a, Rs vaibelchhe 20 dah a nih tawh thu sawiin, “Kuminah hna kan tan dawn a, MLA inthlan dawn khan campaign auhlaah min intiamtir in tum thin kha a ni a, kan intiam duh lo a, a takin kan tihlawhtling thung dawn a ni,” a ti.
Lalnghinglova Hmar chuan Aizawl tlak lam mipui zawng zawngin an chhawr tur Vaivakawn Bazar sak thatna tur sum a thlen tawh thu leh Local Council inthlan MCC-in a phuar loh ruala tender kalpui tura sorkar a inpeih thu a sawi a. December 6 khan sorkar laipuiin SASCI hnuaiah Rs vbc 300 pek an ni a, chumi zingah chuan Vaivakawn Bazar sakna atan Rs vbc 25.35 dah a ni a, restricted tender hmangin a thawktu tur PWD-in an thlang dawn a, thawh zawh thuaia utilisation certificate pek zung zung tul a nih avangin Committee meeting chuan rang taka kalpui a tum thu a sawi bawk.