Aizawl: MNF Vice President Lalchhandama Ralte chuan tun dinhmunah khuarel chhiatna thleng thut se, tam hmachhawn thei reng dinhmunah Mizoram a ding mek niin a sawi.
Thawhtanni leh Thawhlehni khan Tuivawl bialtu MLA Lalchhandama Ralte hian a bial chhung hmun hrang hrang a tlawh a. A bial a tlawhnaah thu sawiin, VC inthlan lo awm turah MNF chuan hnehna sang tak chan tumin hma an lak mek thu a sawi.
Leader of Opposition ni bawk, Lalchhandama Ralte chuan state-a rorelna changtu ZPM chu a thlang tlingtu mipuiin an ning tan mek tih sawiin, “Sorkarin kawng siamna tur tiin road tax a tisang a, oil man an tisang bawk a, an cess lak chu kawng siam nan kan hmang dawn ti reng chung siin kan supply line kawng a la chhe em em reng a ni. Chu mai ni lovin, buhfai man a let thawkin an han tisang a, kan hnianghnar phah lem lo. MNF sorkar hun lai, buhfai man Rs 15 a nih lai khan buhfai kudamte a khat tlangpui a, vawiinah chuan ration la tur khaw hrangten an nghak rei thin hle a, tun dinhmunah khuarel chhiatna rawn thleng palh thut ta se, tam hmachhawn thei reng dinhmunah kan ding mek a ni,” a ti.
He sorkar an hrawn mek hian leiman, chhiah hrang hrang an tipung a, harsatna hrang hrang an tawk mek tih sawiin, “A theihna apiangah mipui min sawrfu mek a ni,” tiin, MNF sorkar khan ram hmasawnna kawng tam takah a thlen a, ZPM chuan zirtirtu indaih lohna pawh dah belh aiin, a awmchhunte pawh a sawn chhuahsak chur chur zawk tih a sawi bawk.