Aizawl: Labour, Employment, Skill Development & Entrepreneurship (LESDE) Minister Lalnghinglova Hmar-in Skill Development & Entrepreneurship (MSDE) kaihhnawiha Mizoram hmalakna leh mamawhte Union Skill Development Minister Jayant Chaudhary a sawipui.
Inrinni tlai khan LESDE minister chuan Chaudhary hi New Delhi-a Kaushal Bhawan-ah a kawm a. An inkawmnaah Lalnghinglova Hmar chuan MSDE hnuaia Sports Sector Council (SSC) chu hmang tangkai turin Mizoramin hma a la mek tih a sawi a. Mizo thalaite tuina leh thiam zawng pahnih, skill leh sports suihfin theih dan awm chungchangah SSC hotute nen an indawr mek thu leh, February thla chhunga Mizorama meeting neih an tum thu a hrilh a. Union minister chuan Mizoram LESDE minister hmalakna chu tha a tih thu leh puih a inhuam thu a hrilh a, amah pawh March thlaah Mizorama zin a tum thu a lo hrilh.
Minister pahnihte hian PMJVK kaltlanga LESDE Department project thehluh chungchang te, PMKVY hnuaia Mizorama skill development training kalpui mek dinhmun leh hmalak ngaihna laite pawh an sawi dun a ni.
Inrinni tlai vek khan Lalnghinglova Hmar hian Surinder Bhagat, Jt. Secretary to Govt. of India, Ministry of External Affairs (MEA) pawh hmuin, ram danga Mizo hnathawkten harsatna an tawh thin hrang hrang a sawipui a. Minister chuan Mizo thalai ram danga hna thawk turte chu dan hnuaiah him takin kal se a duh thu leh, Emigration Act, 1983 hnuaiah Mizoram sorkar chu Registering Authority-a awm an duh thu a thlen bawk.
Bhagat chuan Register Authority dil theih dan sawifiahin MEA leh LESDE department atangin bawhzuitu tur official an ruat nghal a; tihhlawhtlin a nih hunah LESDE department chu Mizoram atanga dan anga MEA kaltlanga ram pawna hnathawk tur thawnchhuaktu an ni thei dawn a ni.
LESDE minister hian sorkar laipui hotute a dawrnaah hian LESDE Director John |anpuia’n a tawiawm a ni.