Mizoram State Election Commission-in local council inthlanna neih turah election model code of conduct (MCC) bawhchhiaa puh a nihnaah PWD Minister Vanlalhlana ngaihdam dilna pawm a ni a; Sports Minister Lalnghinglova Hmar chuan dan a bawhchhiat loh thu a sawi thung.
February 12, 2024-a local council thlanna neih turah State Election Commission chuan minister pahnihte chu MNF Genereal Headquarters-in election MCC bawhchhiaa an puh chungchangah February 3, 2025 tlai dar 4 aia tlai lovah an insawifiahna theh lut turin a hriattir a. Minister pahnihte insawifiahna an ngaihtuah hnuah nimin khan thutlukna a siam a ni.
State Election Commission chuan minister pahnihte chu thupek an nih angin a hun takah a chhang tih a sawi a. PWD Minister Vanlalhlana chuan MCC bawhchhia nia sawi chu, a tum reng vanga video clip hi siam a nih loh thu leh dan bawhchhiatna a ni tih hre lova tihpalh a nih thu sawiin ngaihdam a dil a. State Election Commission chuan thil awm dan hrang hrang chhuia a enfiah hnuah ngun taka a ngaihtuahin a thiltih pha lova ngaihdam a dilna hi a vawi khat tihna a nih avang leh ti tawh lo tura a intiam avangin ngaihdam a dilna chu pawmsak a nih thu leh, video clip hi campaign-naa ngaih theih a nih avangin nuaibo (delete) nghal tur leh hemi atana a hmalakna hi ni thum chhunga theh lut leh turin a hriattir a. Minister hi a intiam ang ngeia inthlan kaihhruaina ngun taka zawm tur leh fimkhur leh zual tura a intiam ang ngeiin, dan bawhchhe lova hma la tawh tura beiseiin a hriattir bawk.
State Election Commission-in MCC bawhchhia nia an puh chungchangah Sports Minister Lalnghinglova Hmar chuan bawhchhiatna a nei lo tih a sawi a. Minister hian an party mite hmaah sorkar hmalakna awm tawh sa leh hma lakna kal mek chungchang a hrilhfiah mai nia a lan avangin, MCC bawhchhiatna a ni lo va; MCC-in a sawi hmasawnna lam hawia bul tanna lung phum leh policy thar puan te, thawh zawh tawh hawnna emaw, chutiang lam kaihhnawih emaw hawnna inkhawm buatsaih leh ruahhmanna thar lam hawi reng reng puan chhuah loh tur tih hian a huam lo niin a sawi.
Minister hian MCC hi party tinin tanhmun inang neia inthlan an hmachhawn theih nana siam a nih avangin a zahawm a, MCC-in inkaihhruaina hrang hrang a siamte hi tha taka zawm chhunzawm zel a tum thu a sawi ang ngeiin fimkhur taka inthlan kaihhruaina zawm tura beiseiin a hriattir a ni.