Aizawl: MZP hruaitute chuan Mizoram University (MZU) Economics department-a zirtirtu pakhat laka zirlaite atanga complain an dawn bawhzuiin nimin khan MZU Vice Chancellor, Prof. Debakar Chandra Deka chu a pisa-ah an kawm.
MZP chuan Dr. Akshaya Kumar Mohanty, Associate Professor, Dept. of Economics laka zirlaite atanga complain an dawn bawhzuiin MZU Vice Chancelloe Prof. Deka hnenah zirlaite harsatna thlenna hmun, Students Grievance Redressal Committee (SGRC), MZU-in hmalakna report an la nei lo chu hriatthiam har an tih thu an thlen a. A rang thei ang bera Dr. Askhay hian a phu tawk hremna a hmuh ngei theihna turin vice chancellor chu hma la tura ngenin, February, 2025 chhung ngeia hmalakna a awm lo a nih chuan na taka hma an lak chhunzawm tur thu an sawi.
MZP chuan Dr. Akshay Kumar chungchanga June 16, 2024 daih tawha registrar kaltlanga zirlai 20 chuangin amah complaint-na lehkha an thehluh bawhzuina report engmah la awm loh mai bakah zirlai tam tak amah avanga rilru lama harsatna tawk hial leh kutthlak hial a neih thu te hriat hian an rilru a tina hle tih sawiin, hetianga zirtirtu hi MZU-a thawk reng tlakah an ngai lo a, zirlaite hmakhua ngaiin VC chu a rang thei ang bera hma lo la ngei turin an ngenin an hriattir nghal a ni.