Aizawl: MPCC Treasurer Dr Lalmalsawma Nghaka chuan kohhran hrang hrangte Isua-a an inpumkhat ang hian, Congress party-a mi hrang hrangte hi mi retheite khai chhuak turin an inpumkhat tlat tih a sawi.
Nimin khan Aizawl South II Constituency huamchhunga Congress aiawh Local Council candidate-te Rev. Lalrinmawia, Ex-Moderator hovin Pathian hnena inhlanna hun an hmang. He hun hmanpuitu Dr Lalmalsawma Nghaka chuan, “Vawiinah hian Congress party angin Local Council leh Village Council-ah kan ding tak na a, mi zawng zawng, a bik takin mi harsa zawk leh insawi thei lo te chanvo humhim sak hi a pawimawh ber a ni,” a ti.
Dr Lalmalsawma Nghaka chuan, khaw tin leh hmun tina an hruaituten, ‘Kei ka din loh chuan tunge ding chuang ang?’ tia mipuite harsatna hriaa an dingchhuak thin hi Congress an danglamna tih sawiin, “Headquarters lama kan hotute pawh tho thil ang thap an nih avangin Congress Party hian hma kan sawn hle a. Pathiana finna kan chan zel a, mi harsa zawkte dinchhuahna tur policy kan neih zel theih nan intawngtaipui tawn a tul hle,” tiin, local council leh village council member tha ni turin hlemthletna laka fihlim, dik leh rinawm a pawimawh hmasa ber thu a sawi bawk.
He hunah hian ram puma party hrang hrang local council leh village council candidate-te pualin tawngtai rualna an nei nghal a ni.