Manchester United defender Lisandro Martinez chuan a khup tha a tihthler a, centre-back hi tun season-ah a inlan thei tawh dawn lo.
Kum 27 mi hi Pathianni zana Crystal Palace an hneh loh tum khan zawn chhuah niin United boss Ruben Amorim chuan ‘dinhmun khirh takah an ding’ tih a sawi.
“A hliam hi ngun taka en mek niin engtianga enkawl nge tha ang a, eng chen nge a chawlh ngai dawn tih pawh chhutpui a ni,” tiin Manchester United chuan Ningani khan an sawi.
“Manchester United-amite zawng zawngin Lisandro Martinez hi tha taka dam chhuak leh tura chakna a neih kan duhsak a, a kal zelnaah kan thlawp tlat zel dawn a ni,” an ti bawk.
Martinez-a tel lo tur hi Amorim-a tan chuan a pawi hle a, Old Trafford club hi an chet that tawk loh avangin kawng dik zawhtir tuma a beih lai mek a ni.
United hi Palace an hneh loh hnuah Premier League-ah 13-na an ni a, tun season-ah an mualah vawi sarih zet an tlawmna a ni tawh.
Martinez-a chanchin thar duhawm loh a awm mek lai hian left-back Luke Shaw pawh a dinhmun a la chiang thei lo va, ani hi thla 12 chhung zet United tan inkhel bul a tan thei tawh lo a ni.
“Licha (Martinez) hi kan tan a pawimawh em em a, football player a nihna piah lamah a nungchang hi kan tan a tangkai a, a bikin tun ang kan hun khirhah hian a pawimawh zual a ni,” tiin Amorim chuan a sawi a. “Tunah erawh chuan Licha hi kan puih a ngai a ni,” a ti.