Mizo Zaimi Inzawmkhawm (MZI) General Headquarters-in kumin Valentine’s Day – February ni 14-ah hian chhun lamah mobile charity concert buatsaihin, zan lamah Berawtlang Tourist Resort-ah concert an buatsaih dawn bawk.
MZI Valentine’s Day mobile charity concert hi rualbanlo naupang, enkawltu mumal neilote enkawlna Bethsaida Children’s Home, Durtlang puala neih tur niin, chawhma dar 10:30-ah Sikulpuikawn-ah Vanlalsailova’n hunserh hmangin a hawng dawn a. Zaithiam te an zai bakah mahni remchan leh phal ang tawka lei theih turin Rose par zawrh a ni ang a, hemi atanga sum lut te chu Bethsaida Children’s Home tana hlan tur a ni dawn a ni.
Sikulpuikawn bakah hian chhun dar 12:30 atangin Israel Point, Dawrpui-ah hun an hmang zui leh nghal ang a, chawhnu dar 2 atangin Chanmari kawn-ah hun an hmang bawk ang.
LPS Youth Icon Taitea leh Icon star dang – Rsa, Mawimawia, Peter-a, Bka, Kimkima te bakah Mizo zaithiam zinga boruak nei lian tak tak – Zoramchhani, Youngfella, Smiley, Spi te leh hranghlui chuai thei lo – Ngurthangvela, Vanlalhlana, Peter C. Lalrinmawia leh Muanpuia (Dreamhunter) te pawh MZI V-day mobile charity concert-ah hian an inlan dawn a ni.
Berawtlang Tourist Resort-a V-day concert chu tlai dar 6 a tan tur niin, Icon star J. Lalrosanga hovin zaithiam eng emawzat an che leh dawn a, hemi chhim tur hi chuan ticket Rs. 200 man lei a ngai dawn thung. A hmunah ei leh in tur chi hrang hrang bakah duhsak zawng te pek tur Rose par lei tur a awm ang.
MZI V-day concert ticket hi online-in (Gpay hmangin) a lei theih dawn a, chhun lama mobile charity concert-ah zawrh a ni bawk ang. Online-a lei te tan gate/entry-ah payment receipt hmangin mahni ticket tur lam mai tur a ni dawn a ni.