Mamata Banerjee-i kaihhruai, Trinamool Congress chuan nakuma West Bengal assembly inthlan tur an thlir lawk tan mek tawh a. Chief minister hian Congress nena thawhho erawh an tum loh thu a sawi chiang.
Banerjee-i hian Thawhtanni khan an party chuan kum 2026 assembly inthlan hi anmahniin an chuh dawn tih a sawi a, party dang emaw, grand old party nen emawa thawhho tum anga titi awm mek chu a dik lo tih a sawi chiang tih news agency PTI chuan a tar lang.
Budget session neih tur puala an party MLA-te a kawmnaah TMC supremo hian nakuma inthlan an hmachhawn tur chu chiang taka an chak leh tur thu leh bial hmun thuma thena hmun hnih an lak leh tur thu a sawi niin an party chuan an sawi.
“Congress khan Delhi-ah Aam Aadmi Party (AAP) kha an pui lo va. Haryana-ah khan AAP-in Congress kha an pui lo bawk a. BJP-in heng state pahnihah hian hnehna an chang ve ve a. Mi tin hi tangho tur kan ni a; mahse, Congress hian Bengal-ah engmah neih an nei lo va. Keimahin ka bei dawn a, keimahni hi kan tawk,” tiin Banerjee-i hian an MLA-te hmaah hian a sawi niin PTI chuan a tar lang a ni.
West Bengal chief minister hian an party chuan bial hmun thuma thena hmun hnih lain an state-ah a zawna a vawi li nan sorkar an siam leh dawn tih a sawi a. PTI chuan Banerjee-i hian mi dang awm ve theih lohna thutkhawmah hian mahni party bil ngaihtuahna leh BJP dotute vote chu dah hrang lo turin an MLA-te hi a hrilh niin a tar lang.
“Chuti a nih loh chuan INDIA tangrual hian ram pum huapin BJP hi an ang thei dawn lo,” a ti a ni.
TMC chief hian an MLA-te hnenah hian BJP-in hnehna an chan theih nan ram dang mite chu voter list-a telh an tum dawn avangin inralring reng turin a chah bawk.
An thutkhawmnaah hian Banerjee-i hian an party-a inrelbawlna chu state-level atanga booth-level thlengin, peng hrang hrangte pawh insiksawi a ni dawn tih a sawi niin PTI chuan a tar lang a. Office-bearer thar turah MLA-te chu nihna pakhat zelah mi pathum rawtin February 25 hmaa an hruaitu hlun, Arup Biswas-a hnena thehlut turin a ti.
TMC chief hian ration scam-a food minister hlui, Jyotipriyo Mallick man a ni chu ‘a dik lo hle’ tih sawiin finfiahna chiang engmah a awm lo niin a sawi bawk.