Aizawl: Mizoram Larsap Gen Vijay Kumar Singh chuan sorkar department pali hotute chu sorkar laipui scheme pawimawh tak tak hnuaia an hmalaknate leh harsatna tawhte a sawipui.
Larsapin a kawmte hi Rural Development, Agriculture, Animal Husbandry & Veterinary leh Fisheries Department te an ni a. An inkawmnaah hian heng department pali hotute hian an hmalaknate an sawi fiah a. Sorkar laipuia bawhzui ngai harsatna an tawhte chu Larsap hnenah an thlen nghal bawk.
Larsap Gen Vijay Kumar Singh chuan hmasawnna kawnga pawimawh tak, sorkar laipui scheme hrang hrang hnuaia Mizorama hmalaknate hriat chian mai bakah, harsatna tawhte sorkar laipuia bawhzui thuai a nih theih nana thutkhawm koh a nih thu a sawi a. Mipuiin an tana ruahman hamthatna hrang hrangte an hriat chian a, an chhawr tangkai theih nan scheme chungchanga pawimawh hrilhhriat leh chhawmdawl kawnga theihtawp chhuah zel turin department hotute a chah.
Scheme tangkawp theite pawt khawma hmasawnna ruhrel tha leh rotling siam ngaihpawimawh a tul thu sawiin Larsap chuan, Mizorama Self Help Group-te thil siam chhuah, sawngbawl dan leh zawrh tura chhawpchhuah a nih dan chu fakawm a tih thu a sawi a. Hmasawnna rahbi thar, loneitute tana tha zawk leh thlanawm tak ngaihtuah zel tura chahin, organic thlai thar chhuah kawngah tan la turin a fuih a. Ran hriselna ngaihpawimawh a tul thu leh sangha thar chhuah kawnga hmalak a tul thu a sawi a. Department hotute chu langtlang leh rintlak zawka hmalak a nih theih nan digitization ngaipawimawh tel turin a chah bawk.
An inkawmnaah hian R. Zarzosanga, Commissioner & Secretary, Rural Development; H.M. Hualsangi, Secretary, Fisheries Department; Ramdinliani, Special Secretary, Agriculture Department; Lalnunhlua, Addl. Secretary, Rural Development; Andrew H. Vanlaldika, Addl. Secretary, A.H& Vety. te bakah Secretariat leh Directorate-a department hotu dangte an tel a ni.