Aizawl: February 13-16, 2025 chhunga Lunglawn mual, Lunglei-a neih tur Mizoram Thalai Kristian Pawl (MTKP) Inkhawmpui vawi 48-na neih tur atan inbuatsaihna engkim peih fel a ni tawh.
Thawhlehni khan MTKP hruaitute chuan an President Upa R. Lalrochama hovin Lunglei Press Club-ah thuthar thehdarhtute an kawm a. He hunah hian MTKP inkhawmpui tur chungchanga thu pawimawh hrang hrang an sawi fiah a ni.
MTKP President Upa R. Lalrochama chuan Lunglawna MTKP inkhawmpui neih turah inbuatsaihna peih fel tawh a nih thu a sawi a. Tun tum inkawmpuiah hian thupui atan ‘Pathian Hnaih rawh U (Jacob 4:8)’ tih hman niin, mi hrang hrangin inkhawmpui chhung hian thuchah an insawi chhawk dawn a. Pastor bial hrang hrang TKP zaipawl leh mi mal zaite ngaihthlak thin a nih tur thu leh lemchan hmuhnawm tak tak entir a nih tur thu a sawi.
He huna tar lan danin, Lunglawn Pastor Bialin a thlen tur inkhawmpui senso atan Rs nuai 70 an ruahman bakah MTKP-in Rs nuai 42-in a tumpui dawn bawk.
Inkhawmpui pandalah hian mi 9,000 vel leng tura beisei a ni a. Inkhawmpui pandal zau zawng hi a dung ft 230 leh a vang ft 184 tura duan a ni a. Pandal hmingah ‘Krista Pasalthate Run’ vuah a ni.
Tun dinhmunah MTKP hi Pastor bial 92-ah Unit 447 awmin; member 50,364 an awm mek a ni.