Aizawl: Champhaia mipa naupang kum li mi na taka sawisatu nia puh, Lalrampari, Champhai Venglaia mi chu nimin khan Champhai Police-in an man.
Champhai atanga thudawn danin he insawisakna hi Thawhtannia thleng niin, naupang nu hi Chawngthu Hotel-a inhlawh thin a ni a, a inhlawh hlan hian a unaupa (a cousin) nupui hnenah a fapa hi awm turin a dah thin a ni.
Naupang sawisatua puh, Lalrampari’n police-te hnena a sawi danin, naupang nu hian a chhun thil eina tur a fapa hi a kentir thin a; Thawhtanni hian pawisa a kentir leh tir loh a zawt a, pawisa a kentir loh thu naupang hian sawiin, a nu a umzui a, a kir leh mai tak loh avangin Lalrampari hian a zawng zui a, a hmuh hnu hian a sawisa zui ta niin a sawi.
Naupang a sawisak hi nikhawhreloa a awm avangin DM Hospital-ah a hruai a, naupang hi a ban vei lam ruh a tliak a, a lu ruh a khik bakah a lu-ah thi a tling bawk a, a taksa hmun hrang hrangah kut thlakna hnuhma tam tak a awm bawk a. He thil thleng chungchang hi DM Hospital-a thawktute chuan District Child Protection Unit hrilhin, Child Welfare Committee-in hma an la zui ta a ni.
Child Welfare Committee-in Champhai Police Station-ah FIR theh lutin, naupang na taka sawisatu nia puh, Lalrampari hi Champhai Police-te chuan manin, The Juvenile Justice Act leh BNS(2) hmanga thubuai siamsak a ni a, nimin khan Champhai District Court-ah hruai niin, lung inah dah luh a ni.
He thil thleng chungchangah hian a tuartu naupang kumtlinglo thlalak hi social media-ah vawrh darh a ni a. Naupang kumtlinglo thlalak vawrh darh hi dan bawhchhiatna a nih avangin thlalak vawrh darhtu hi District Child Protection Unit chuan an chhuizui mek bawk a. Dan bawhchhia chu thla ruk lung in tang tur leh Rs nuai 2 thleng chawi tura hrem theih a ni.