Aizawl: Mizoram Lokayukta hi March 2019-a din a nih atanga February 10, 2025 thleng khan eirukna thubuai 71 a ziak lut tawh a, heng zingah mi pali thiam loh a chantir tawh.
Mizoram Lokayukta Act, 2014-in a phut angin Mizoram Lokayukta Chairman Lalmalsawma chuan nimin khan Mizoram Lokayukta Fifth Annual Report 2023-2024 chu Larsap General Vijay Kumar Singh hnenah Raj Bhavan-ah a hlan.
Annual report-in a tar lan dan chuan kum 2023-2024 chhung khan Mizoram Lokayukta hnuaiah eirukna thubuai case pariat ziah luh a ni a; heng case-te hi preliminary inquiry tura tih niin, heng zinga case pasarihte report hi dawn tawh a ni.
March 2019-a Mizoram Lokayukta din a nih atanga February 10, 2025 thleng khan Mizoram Lokayukta hnuaiah thubuai 71 ziah luh tawh niin, heng zinga thubuai 46-te hi chhui zui tlaka ngaih a ni a. Thubuai ngaihtuahna hearing tum 38 neih tawh a ni a, thiam loh chantir pali leh thiam chantir pakhat an awm tawh a. Department proceeding tura tih thubuai pathum a awm tawh bawk.
Sorkar kum liamta April 1, 2023 leh March 31, 2024 inkara Mizoram Lokayukta Annual Report an inhlannaah hian Larsap Gen. Singh chuan Mizoram Lokayukta Chairperson Lalmalsawma bakah hian Lalsanglura, Member leh Joel Joseph Denga, Member (Judicial) te chu an hmalakna hrang hrangte a sawipui a. Chairperson-in Mizoram Lokayukta dinhmun leh hmalakna tlangpui bakah, Mizoram Lokayukta hnuaia thubuai neih dan leh bawhzui dante bakah dinhmun leh thlen chinte hrilh bawk.
Mizoram Lokayukta Fifth Annual Report 2023-2024 hi Mizoram Legislative Assembly-ah pharh a ni ang.