Aizawl: Mamit District Magistrate K Laltlawmlova chuan Mamit district chhungah ram dang (foreign) leh state dang atanga vawk leh vawksa rep bakah vawksa atanga siam lak luh khapna thupek a tichhuak.
Khapna thupek a tihchhuahah Mamit Bawrhsap ni bawk K Laltlawmlova chuan, tun laiin Mizoram leh thenawm state-ah ran hri (ASF) leng mekin ziaawm lam a pan theih loh avangin, he hri laka Mamit District mipuite ranvulh an lo him zawk theih nan Mamit district huam chhungah ram dang leh state dang bakah ASF lenna hmun area/district dang atangin vawk, vawksa leh a rep atanga siam ei tur lakluh leh, tan dam lo leh hrisello ei tur atana hralh leh zawrh a khap a.
Vawk thi reng reng chinai thi/bleaching powder nen thuk taka phum tur a ni a, khamah leh ramhnuaiah paih mai mai tur a ni lo va. Vawk thi a awmin a neituten A.H & Vety Department, Mamit hriattir vat turin thupek a tichhuak.
Thupek bawhchhetute chu Section 223, Bharatiya Nyaya Sanhita (BNS), 2023 hmangin hrem theih an nih thu leh, khapna thupek hian tihdanglam emaw, hnuhlet emaw a nih loh chuan, chhuah a nih atanga thla hnih chhung a huam tur thu a tar lang bawk.