Aizawl: Saitual district chhung Changzawl khuaa Lalchhana-te chhungkaw luah lai in chu nimin zing dar 3 vel khan bungraw chuh hman lohin a kang ral. Vanneihthlak takin thi leh hliam tuar erawh an awm lo.
In kang hi Lalchhanate nupa bakah an fate pathum luah lai a ni. Kangmei chhuah chhan chiah hi hriat ni lo mah se, an inhnuai thuk vel atanga chhuak a nih rin a ni.
Kangmei a chhuak tih an hriatin an thenawmte chuan Lalchhana-te chhungkua an kai tho a, bungraw chuh hman lovin an tlan chhuak a ni.
Kangmei hian in leh an bungruate a kan chhiat vek bakah in kawta an dah, an bike leh bolero camper pawh a kang chhe vek a. Kangmeiin a tihchhiat hi Rs nuai 20-25 man hu vel nia chhut a ni.
Changzawl Joint YMA leh VC bultumin nimin khan kangmeiin a kan chhiat bungrua te thenfai bakah in sak that hnatlang koh a ni a. An thenawm khuaten an hnatlanpui bakah pawisate an thawh a. Vawiin hian sak chhunzawm tura ruahman niin, nimin lama hnatlang ve hman lo an thenawm khua atanga kal lote pawhin an thawh chhuahpui dawn nia thudawn a ni.