Aizawl: Lungleia dragonfruit chingtuten an thlai thar chhuahte man bithliah (rate) felfai leh man man zawka an hralh chhuah theih nan Mizoram Dragonfruit Farmers’ Association (MIDFA), Sub-Headquarters, Lunglei leh Tawitlang Farmers Producers Company ten nimin khan inremna thuthlung (Memorandum of Understanding – MoU) an ziak.
Inremna hi District Horticulture Office-ah an ziak a. Inremna an ziah ang chuan Lunglei district chhunga thar chhuah dragonfruit tha chu MIDFA Sub-Hqrs, Lunglei te hnen atangin Tawitlang Farmers Producers Company te hian kg khatah Rs 130-in an leisak dawn a ni.
He an inremnaah hian inremna an siam hian ni November 30, 2025 thleng a huam dawn a. Dragonfruit lei turte hi a grade then a ni dawn lo va; amaherawchu, a pum hmin tha leh him chauh an lei dawn thung a. Dragonfruit thar chhuahte lak khawm, thliar fel, buk leh hralhna hmun atan Mualthuam ‘N’, Pukpui leh DHO Office, Lungleiah collection centre dah tum a ni bawk.
Inremnaah hian a hralhtu lam, MIDFA Sub-Hqrs Lunglei aiawhin President R. Lalthanmawia leh Secretary Lalramengmawia ten hming an ziak a. A leitu tur lam, Tawitlang Farmers Producers Company aiawhin Chief Executive Officer Lalthlamuana Sailo leh General Manager Vanlaltanpuia ten hming an ziak a ni.
Lunglei District Horticulture Officer B. Lalzarzova leh Lunglei District Commerce & Industries Officer F. Lalsawmliana te chu hriatpuitu an ni bawk.