Aizawl: MSACS chhinchhiah danin April, 2024 atanga nimin thleng khan HIV positive hmuhchhuah thar 1,669 an awm a, heng zinga 1,015 hi hmeichhiat mipat hmanna avanga kai a ni.
Ningani khan Millennium Centre Roof Top-ah ‘International Condom Day’ hman a ni a. Mizoram State AIDS Control Society, AIDS Healthcare Foundation India Cares leh Samaritan Society of Mizoram-te hmalaknain he hun hi buatsaih a ni.
He huna tar lan a nih danin Mizorama HIV kai hmuhchhuah tawh zinga zaa 60 aia tam chu mipat hmeichhiatna atanga kai an ni a. HIV kai hmuhchhuah tawhte hian HIV inkaichhawn dan an sawi thei deuh vek thu leh ngaihzawng kawppui nghet leh an mi hriatchiante mipat hmeichhiatna an hmanpuinaah condom an hman loh vanga HIV kai an ni deuh vek an ni.
He hunah hian Mizoram State AIDS Control Society Project Director Dr. Jane R.Ralte chuan, Generation C Campaign leh Love Brigade 2.0 Campaign a hawng a. Generation C Campaign-ah hian thalaite hnenah condom hman tangkaina leh a pawimawhna zirtirna ngawr ngawr ni lovin, nupui/pasal neih hma chu mipat hmeichhiatna hman loh a him ber thu zirtirna uar taka kalpui a nih tur thu a sawi.
Kum 2020 atang khan Love Brigade Campaign kalpui a lo ni tawh bawk.
Tun tumah hian Two Wheelers Taxi Association-te nena tangkawpin, Two Wheelers Taxi Driver eng emaw zat hnenah Condom Jacket sem a ni a, Aizawla Auto Drivers Association te hnenah HIV chungchang zirtirna hmanrua dahna tur seat cover zat sem a ni bawk.