Aizawl: Hnahthial district chhungah sawhthing 5,250 quintal lei a ni dawn.
Ningani khan Hnahthial district-in sawhthing an lei dan tur ngaihtuahin DC Meeting Hall-ah thutkhawm neih a ni a. He hunah District Bawrhsap leh Hnahthial District Agriculture Marketing Committee (DAMC) chairman ni bawk, Rita Lalnunmawii Pachuau chuan an hma lawka sorkarin kut hnathawktute sawhthing thar chhuah a leisak dawn avangin, hemi atan hian theihtawp chhuaha an inbuatsaih a tul thu a sawi.
Mizoram Agricultural Marketing Board (MAMB) Coordinator, Dr. Malsawmdawngliana pawhin, a hmasa ber atan Hnahthial District chhungah sawhthing 5,250qtls lei tur a ni dawn tih a sawi a, hemi atan MAMB inbuatsaihna hrang hrang a sawi bawk.
Thutkhawmah hian Hnahthial district chhunga Secondary Collection Centre hrang hrang vil tur an inruat fel a. Collection Centre tinah sawhthing dahna tur buara bag chu 1,000 theuhvin sem chhuah an rel a. Hnahthial Secondary Collection Centre-a awm, South Lungleng chu Darzo Secondary Collection Centre-ah dahin, chawlhkar thar Thawhlehni hian Hnahthial district chhung Collection Centre-a Manager leh Accountant te tan Sensitization Programme buatsaih an rel bawk.