Mizoram district pakuaa local council (LC) leh village council (VC) inthlanah a pum puiah rorel lai ZPM party-in seat an la tam ber.
February 12, 2025-a local council leh village council inthlanna neih niin vote thlak a ni a. Vote tlate hi zan dar 7 atanga chhiar tan tura tih ni mah se hmun thenkhatah hun bituk chhung, tlai dar 4 thlenga vote la thlak hman lo awmna polling station-ah te chuan vote thlak zawhtir vek an nih hnuah chhiar tan a ni.
Aizawl Municipal Corporation (AMC) huam chhunga Lawipu Local Council tih loh local council 86-a inthlanna neihah rorel lai ZPM chuan seat 302 lain LC 46-ah hnehna an chang a. MNF-in seat 155 lain LC 20-ah hnehna an chang a. INC-in seat 104 lain, LC pariatah an chak a. Independent-in seat riat lain, LC pahnihah hnehna an chang a. Party mala sorkarna siam thei lo LC 10 a awm bawk.
Lunglei Municipal Corporation (LMC) huam chhunga local council 24-a seat 148 awmah ZPM-in seat 60 lain LC pariatah hnehna an chang a; MNF chuan seat 41 lain LC pasarihah hnehna an chang a; INC chuan seat 43 lain LC parukah hnehna an chang a; independent candidate-ten seat thum (general vek) la mah se, sorkarna siam theihna an nei lo. Party mala LC siam thei awm lohna LC pathum a awm a ni.
Mizoram district pakua-a village council 544 awmah VC 543-ah inthlan niin ZPM chuan seat 1,153 lain VC 266-ah hnehna an chang a, MNF-in seat 744 lain, VC 122-ah hnehna an chang a, INC-in seat 406 lain VC 43-ah hnehna changin BJP-in seat 17 lain VC pakhatah hnehna an chang a, HPC-in seat li lain, VC pasarih hnenah an chang a. Independent ten seat 87 lain VC pasarihah hnehna an chang a, party mala sorkarna siam theih lohna VC 104 a awm bawk.
State Election Commission-in a ruahman angin he inthlana chakna changte chuan vawiin hian executive body siam fel tura tih an ni a. February 15, 2025-ah he inthlan kaihhnawih zawng zawngte chu zawh fel vek tur a ni bawk.
Thlirvelna
Local council/village council inthlanah hian vote tla zawng zawng hi local council-ah 63.87% niin village council-ah 50.83% a ni.
Aizawl district huam chhungah village council 70 a awm a. Voter 65,076 (mipa 31,611, hmeichhia 33,465) atangin vote tla zawng zawng chu 32,940 (50.62%) a ni a. Election duty avanga vote lo thlak hmasa 138 nena belhin, a vaiin vote 3,3708 (50.83%) a tla a ni.
Aizawl Municipal Council huam chhungah local council 87 zinga 86-ah inthlanna neih niin, voter 2,41,076 (mipa 1,10,965 leh hmeichhia 1,30,111) awmin, vote tla zawng zawng chu 1,52,506 (63.26%) a ni a. Election duty avanga vote lo thlak hmasak tawh nen belhkhawmin, a vaiin local council 86-ah hian vote 1,53,986 (63.87%) a tla a ni.
Vawiin hian Lawipu Local Council bikah vote thlak a ni ang.