Aizawl: BJP Mizoram President Vanlalhmuaka chuan BJP an din chhan chu Mizoram leh hnam tan a ni a, an mission hlawhtlinna bul chu Pathian chauh a ni a, State Day of Prayer hmannaah BJP hruaitute leh member-te a tam thei ang ber kal turin an inbuatsaih thu a sawi.
Nimin khan State Day of Prayer Committee chuan BJP pisa tlawhin inkhawm an hmanpui a. He huna thusawitu, BJP Mizoram President Vanlalhmuaka chuan state tana kohhran bik awm lo leh party lam engmah sawi lo va, ram leh hnam damna tur atana tawngtaina hun buatsaih a ni tur chu lawmawm a tih thu a sawiin, “BJP chuan kan din chhan Mizoram leh hnam tan a nih avangin chumi kan mission hlawhtlinna bul chu Pathian chauh hi a ni a, he tawngtaina hun pawimawh takah hian BJP hruaitute leh member-te a tam thei ang ber kal turin kan inbuatsaih dawn a ni,” a ti.