Aizawl: MNYF President Robert Romawia Royte, MLA chuan central sorkarin Mizoram a zuam ta lutuk chu pawi a tih thu sawiin, “Hnam party a sorkar leh a ngai,” a ti.
Thawhtannia MNF Hnam Run-a chhung inkhawm an neihah Robert Romawia Royte chuan, MNF chu hnam party an ni a, an hotute rorelna leh ram rorelnaah pawh a lang fo tih a sawi a. Free Movement Regime – Burma nena inkalpawhna chu chief minister thar chuan Delhi a zin tumin, hei hi central sorkar thu a nih thu a zu thlen tih sawiin, “Assembly-ah ZPM MLA-in FMR dodalna a putluh chu zaah zain kan thlawp a nih kha. Amaherawhchu, December 30, 2024 khan Mizoram sorkar chuan order tichhuakin, Mizo mipuite tan mai ni lo hmarchhak tribal mipuite tana thil tha lo tak, FMR hlihna chu kalpui a ni ta a ni. MNF kha la sorkar ila chuan hei hi kan tih loh tawp tur a ni ang,” a ti.
Central sorkarin Mizoram a zuam ta lutuk tih sawiin Robert Romawia Royte chuan, “North East state-ah Mizoram min zuam ber. A pawi tak zet a ni. Hnam party kan sorkar leh thuai loh chuan kan ram leh hnam tan a him dawn lo a ni,” a ti a. Nagaland CM pawh Delhi-ah kalin FMR a dodal thu huai taka a puan ngam thu a sawi bawk.