Vinicius Jr chuan Real Madrid-a a awm chu ‘a mumang ramah awm’ a nih thu sawiin Champions League nomawi kawl mektu club-ah hian contract ziah belh a duh thu a sawi.
Brazil forward kum 24 mi hian tunah hian kum hnih daih contract a la nei mek a, Saudi Pro League lamin lak an tum niin thu a thang mek.
“Contract hi kum 2027 thleng ka la nei mek a, ka ziah belh thuai ka inbeisei a, he hmunah hian ka hlim a ni,” a ti.
“Khawvela player tha ber berte nen kan khel thei hi mumang ram a ni ber a, coach tha ber, president tha ber leh fan tha ber an awm a. Mi tinin min hmangaih a, a aia hmun nuam a awm chuang lo,” a ti.
Vinicius hian Flamengo chhuahsanin kum 2018 khan Real hi a zawm a, La Liga nomawi pathum leh Champions League nomawi pahnih a lakpui tawh.
Real hian Thawhlehni zan khan European nomawi an kawl lai humhim tumin an thenawm, Atletico an tlawh a, result kan hre hman lo va. Vinicius-a hian club tan vawi 300 a khelh tawhah goal 102 a thunsak tawh.
“Ka naupan laia ka lo suangtuah thin chu tuna mi hi a ni,” a ti a. “Tunah chuan chu ka chen mek a, ka thawnthu ka ziak mek zel a ni,” a ti.
“Nomawi ka lo la tawh a, tam zawk laa he club chanchin ziah zel hi ka duh a. Player tha tak tak leh legend tam tak an awm tawh a, chutiang mi nih ve chu ka duh a ni,” a ti.
Vinicius-a hian kum 2024 khan mi mal chawimawina sang a dawn hmasa ber dawngin Fifa Best men’s player of the year atan thlan a ni.
Ballon d’Or erawh Manchester City leh Spain midfielder Rodri lakah a chân a, Real chuan a phu zawk ni ngeia an hriat avangin Paris-a chawimawina sem inkhawm an boycott hial a ni.
European champions hian Vinicius-a’n chawimawina a dawng dawn lo tih an hriat hnuah Real-in ‘zah a hlawh lohna hmunah’ chuan khawiah mah an tel dawn lo tih an sawi niin news agency AFP leh Spanish chanchinbute chuan an tar lang hlawm.
Chawimawina sem inkhawma a tel loh chungchang an zawhna chu, “Club-in ti tura min hrilh ka ti mai a ni a. Club-in Madrid chhuahsan lo turin min ti a, ka awm mai a, a dawt leh ka nghak mai a ni,” a ti.
Vinicius chuan, “Ballon d’Or hi ka lo ngaihtuah ngai loh a ni a; mahse, dawng ve thei mai dinhmuna han din chuan dawn ve ngei chu ka duh. He club nen hian chawimawina tam tak dawn theihna hun ka la nei hi a pawimawh ber a. Champions Leagues-ah vawi hnih kan champion tawh a, a dang pawh kan la zel ang,” a ti.