Finance department changtu, Chief Minister Lalduhoma chuan nimin khan assembly session-ah kum 2025-26 Mizoram budget a pharh a. Kum 2025-26 Mizoram budget tur chu Rs vbc 15,198.76 a ni a; Mizoram sorkar flagship programme Hand Holding scheme-ah Rs vbc 350 dah a ni.

Kum kal mek chhunga sum indaih lohna supplementary demand for grants Rs. vbc 3,512.33 chu house pawmpui turin a pharh tel bawk.

Sorkar kum tharah revenue surplus Rs vbc 562.91 ni tura beisei a ni a, hei hi Mizoram mipui sum thawhchhuah, (GSDP) atanga chhutin zaa 1.56 a ni a. Fiscal deficit chu Rs vbc 1651.68 ni tura chhut niin, heihi GSDP atanga chhut zaa 4.57 a ni a. Sorkar laibe tlingkhawm chu Rs vbc 13,999 ni tura chhugn niin heihi GSDP atanga chhutin zaa 38.79 niin, kum kal mek aiin zaa 9.57 in a tam zawk.

Sorkar hnathawk hlawh leh sorkar inrelbawlna hrang hranga hman tur revenue expenditure Rs. vbc 12,540.20 niin, hei hi budget pumpui ruahman atanga za-a 82.51 a ni a. Hmasawnna hna hrang hrang hnathawhna tur tia sawi mai thin, capital expenditure Rs. vbc 2,658.56 niin, hei hi budget pumpui atanga zaa 17.49 a ni thung.

State sorkar sum hmuhna hnar hnar (revenue receipts) – own tax leh non tax revenue, finance commission rawtna zulzuia chhiah insem (tax devolution), bakah sorkar laipui atanga grant leh loan hrang hrang atanga hmuh beisei Rs. vbc 12,947.61 a ni a. State’s own tax atanga hmuh beisei Rs. vbc 1,478.26 niin, kum kal mek aiin zaa 12.64 in a pung a. Non-tax revenue atangin Rs vbc 1138.07 hmuh beisei a ni a, kum kal meka beisei aiin Rs vbc 15.68 in a tam zawk.

Chhiah tlingkhawm atanga state hrang hrangte insem tura sorkar laipuiin za-a 41 a ruahman Rs. vbc 14,22,444.11 niin, heta tanga Mizoram chan tur ruahman chu zaa 0.5 a ni a. Chu chu Rs vbc 7,112.23 a ni. Kum kal mek budget aiin zaa 16.61 in a sang zawk a. Post Devolution Revenue Deficit Grant (PDRDG) atan Rs. vbc 1,079 ruahman a nih laiin, kum tharah erawh Rs vbc 586 ruahman a ni thung.

General services sector-a sum ruahman Rs vbc 6510.39 (revenue section atan Rs. vbc 5031.80 leh capital section atan Rs. vbc 1478.59) a ni a. Hei hi budget pum pui atanga za-a 42.84 a ni. He sector hian sorkar inrelbawlna thahrui an tih mai – legislature, general administration, district administration, election, home, lok ayukta leh fiscal services a huam.

Social services sector atana sum ruahman Rs. vbc 4,747.24 (revenue section Rs. vbc 4,475.21 leh capital section Rs. vbc 272.03) a ni a. Hei hi budget pumpui atanga za-a 31.23 niin, he section hian education, sports, health & family welfare, water supply & sanitation, housing, local administration leh district council, social welfare leh labour & employment-te a huam.

Economic services sector atana sum ruahman Rs. vbc 3,518.372 ruahman a ni a. Hei hi budget pumpui atanga za-a 23.15 niin, he section hian agriculture and allied services, rural development, MLA local area development fund, power, irrigation & flood control, road transport, communication, science & technology, environment, tourism leh civil supplies lam te a huam.

Pawimawh

1. Health Care Scheme atana kum kal meka dah Rs vbc 20 chu Rs vbc 50-ah tihsan a ni.
2. Economic sector hnuaia flagship programme ‘Mizoram Bana Kaih (Hand Holding)’ atan Rs vbc 350 ruahman niin, kum kal mek a Rs vbc 200 aiin zaa 75 in a sang.
3. State Disaster Rick Management Fund (SDRMF) atan Rs vbc 57 ruahman.
4. CSS atang Rs vbc 2,314.04 beisei. Kum kal meka beisei zat aiin Rs vbc 163.95 in tlem zawk.
5. Kawng siamna leh thuam that nan Rs vbc 100 ruahman.
6. Power leina tur Rs vbc 500 dah a ni. Kum kal meka dah aiin Rs vbc 50 in a sang.
7. MLA fund a ngaia kalpui tur.
8. Ruang phurhna atan Rs vbc 5 dah leh.