- Rinfela Zadeng
Thuthlung Hluia Hebrai ho dan langsar ber pawl chu ‘Mit aia mit, ha aia ha, kut aia kut, ke aia ke’ tih Exodus 21:24 thu hi a ni a; helai thu hi kan hre vek awm e. Rom ho rorelna tawngkamin ‘Lex talionis’ tiin an sawi thin a, mi pahnih inkar thubuaiah an hmang thin a ni. He lai thu hmang hian kan vawiin khawvel milin kan thiam tawk beitham tak hmangin Pathian thu zir kan tum dawn a ni.
- Mit aia mit
He thupek rorum tak mai hi Thuthlung Hlui hunah Pathianin Israel fate hnenah Mosia kaltlanga a pek a ni a. Hetiang thupek hi Mesopotamia-ho dan Hammurabi-ah te, Sumerian-ho dan Lipit – Isthar an tihah te pawh hmuh tur a awm a. He dan hian tum reng vanga tualthahna chuan a ziak ang ngau ngau hian hman a nih thu Number 35:16-21 ah kan hmu. Leviticus 24:17-23-ah he lai thu zulzui hi kan hmu leh a, ESV Global Study Bible-in a hrilhfiah dan chuan – kan thiltih sual phu tawka hremna lekkawh tur a ni a, mimal phuba lakna leh mahni kut zala tih tur ni loin rorelna hmaa dan lekkawh dan tur chungchang a sawina a ni. He dan rorum tak hi a nihna ang tak hian engkimah hman tur tihna a ni lo a, Israel fate pawh khan a ziak ang ngau ngau hi chuan an hmang zui vek lo niin mi thiamte chuan an sawi bawk.
- Lal Isua’n engtin nge a tih?
He dan rorum tak hi Chanchin Tha Matthaia ziak 5:38-42-ah Lal Isua’n tlang chunga thu a sawinaah khan a sawi lang a; mi sual te dodal lo tur leh tlawmna hmanga hneh turin Lal Isua hian min zirtir tih kan hmu. Helai thu Lal Isua’n a sawi awmzia ber chu – mi dangte tana nun a ni. Mi dangte ngaihsak leh tanpui duhna rilru pu tur te, Pathian kan rinna chu kan nuna lang chhuak tura min zirtirna leh min mamawhtute mamawh bak pawh inhuam tura Lal Isua min zirtirna leh fuihna thu a ni. Tin, phuba lak hrim hrim hi Lal Isua’n a phal lo a, Pathian pawhin a kuta dah turin thu min pe tih kan hre awm e (Deut. 32:35). Lal Isua hnung zuitu kan nihna hmangin mi dang, mi sual leh mi tha lo zawkte chu kan thiltih leh kan nun hmanga hneh turin Lal Isua hian min duh a, Pathian khawngaihna thukzia tarlang turin Lal Isua hian min duh a ni tiin kan sawi thei ang.
- Phuba lakna ropui ber chu ngaihdamna
Thuthlung Hlui huna dan rorum tak leh hremna khawng tak chu mihringin a tlin lo a; Lal Isua Krista khawngaihna leh ngaihdamna tel lo chuan mihring tan chatuan nunna chu chan theih a nih tawh loh avangin Lal Isua ngei pawhin chutianga nung tur chuan keini amah zuitu te hi min zirtir a, ‘Lex talionis’ chu khawngaihna leh ngaihdamna hmanga mi dang te chunga kan rilru leh ngaihtuahna pawh thlak danglam turin min zirtir a ni. Chuvangin kan chunga thil tisual tu te, mi dang sualna leh mualphona te pawh khawngaihna leh ngaihdamna rilru pua an mahni siam tha tur leh an tana nung zawk tur kan nihna hi i hrechiang nawn ang u. Keini ngei pawh mualpho thei, kan sualna avanga hremna tawk thei leh tawk mek pawh kan ni ngei ang. Lal Isua khawngaihna leh ngaihdamna, kan mihring pui te chunga lo lang chhuak chu lawm taka pawma sim tura nun hi kan bat leh kan mawhphurhna a ni bawk.
- Social Media leh kan tawngkam
Social Media hi sawifiah leh chuan ngai tawh lo khawpin vawiinah chuan kan nunpui a, kan mutpui a, kan thawhpui bawk. Chutah chuan mi zawng zawngin kan rilru leh kan ngaihtuahna te, kan thil vei zawng leh mi chanchin te kan sawi thei a, a tangkai hle. Chutih rual chuan tute emaw chuan mualphona vawrtawp kan tawk a; kan ngaihvenin kan sawisel zui luai luai a. Hmeichhia aiin mipa hi kan tawng thei zawk emaw tih turin mi chanchin tha lo sawiin kan cheksawlh zui nasa thei hle. Kan phu tawk hremna leh kan sualna mil tawka hrem tur hi ni ta ila, social media lama mualpho kher loa kan sualna tam tak hi thihpui tlak khawp sualna a ni. Hemi kawngah hian Mizo kan nih angin leh Lal Isua zuitu Kristian kan nihna angin, phuba la mai loa ngaihdamna leh hmangaihna nena mi dangte siam tha tur leh pui tura hma lak hi kan bat leh kan mawhphurhna zawk a ni tih kan hriat chian nawn hi a tul tak zet. An mualpho tawh a, hremna chu an dam chhungin an tuar tawh dawn. Keini hian chu an mualphona leh herawm tawrhna zawng zawngte hliah khuha kan tawngkam leh kan nun hmanga Lal Isua hnena hruai thlen hi kan mawhphurhna lian tak a ni tih hria ang u.
- Ngaihdamna hi sual tih phalna a ni lo
Thuthlung Hlui dana lunga den hlum nghal tur hmeichhe uire lai mek chu Lal Isua hnenah hruai a nih thu kan hmu a (Jn. 8); Lal Isua’n engtin nge a tih dawn tih chu sakhaw hruaitu, dan lam mi te leh mipui te chuan hre chakin an thlir thup tih kan hmu. Lal Isua chuan uirenu a ngaihdam dawn khan a thuneihna a hmang nghal ngawt lo a; uirena sual chunga phuba la tlak khawpa mi fel a zawn hnuah tumahin an tlin loh avangin an kal bo zo tih kan hmu. Chutianga uirenu deng hlum tlak khawpa mi fel an awm loh hnuah Lal Isua pawh khan a ngaidam a; mahse chutah chuan a tawp mai lo. Ngaihdamna chuan simna a keng tel a, thil sual ti nawn tawh lo tura mawhphurhna leh thupekin a zui tih kan hmu. Keini pawh kan sualna avanga khawngaihna leh ngaihdamna kan chan hian sim tura phut kan ni a, kan tih tur a ni bawk. Simna tel loa ngaihdamna chang chawia suala kan awm reng a nih chuan a tawpah tisa leh thlaraua thihna, chatuan hremna erawh chu kan pum pelh ngai dawn lo tih hi Bible zirtirna leh khawvel kalphungah pawh thudik kum hlun a ni.
- Hremna leh ngaihdamna
Mizote hi Kristian kan nih avangte, thenawmte nen an hnah insuah tawm liam liam thin kan nihna te hian min la phuarkhawm reng a. Dan loa mi chunga chet te, dan loa kan chunga che thinte ngaihdam mai kan duh fo a, kan ti fo reng a ni. Chumi rah chhuah chu – dik vak lo leh tling zo chiah si loa hausak, hna hmuh, mahni inhaivurna adt atan kan hmang hlauh a. Mizo leh Kristian kan nihna changchawiin sual leh thil dik lo kan hmu mam a, phuba lak leh a phu tawk hremna petu nih aiin ngaidamtu nihna hi kan duhdan leh ropui kan tih zawk a ni thin. Mahse chu chuan sual a vulh lian a, thil dik tawk lo pawh a dik anga pawm mai duhnaah min hruai lut zel chu a nih hi. Khawvela kan awm chhung chuan sual a awm reng dawn a, chu chu Sorkar dan fel tak hnuaiah hremna a awm zel bawk ang. Hremna hi ngaihdam lohna a ni ngawt lo a; sual pung zel tur venna leh thil sual titu ngei pawh a insiamthatna hmanraw pawimawh tak a ni tel bawk. Kristian kan nih avang te, Mizo kan nih avangte hian mi dangte chunga phuba la nghal mai loa ngaihdama nun kawng tha an neihna tura kaihhruai leh hun pek hi Pathian duhdan a ni a. Sual vulhlenna atana ngaihdamna ngaihsam leh mahni pawhin sim miah si loa thil dik lo kan tih ve tho avanga mi dangte ngaidam zel tur erawh kan ni lo. Chu chu Pathian atanga chhuak ngaihdamna awmze leh thil tum pawh a ni hek lo.
Dik taka nung tur kan ni a, kan famkim hauh lo ang. Khawvel tha zawk, Kristian puitling zawk, Mizo hnam puitling zawk kan siam theihna tur chuan keimahni theuh hi dik hmasa zel ila. Hrem ngai erawh hrem ila, ngaihdamna leh hremna hi Pathian kan neihna tur atana hmanraw intluk a ni tih hi i zir chhuak ang u.