Nikum December thla khan inhualna an nei a, hemi hnua an hla thar ber ‘Sunset Blvd’ tih chu kartawp khan Selena Gomez leh Benny Blanco te chuan an tichhuak.
An pahniha an tihchhuah thar tur ‘I Said I Love You First’ tih album a an hla awm tur zinga pakhat niin, an music video hi ngaihthlak leh thlir a manhla hle.
Kum 32 mi Gomez hian instagram lamah a ngaihzawng kum 37 mi Blanco nen an thlalak hi ni reivak lo liamtaah khan tarlangin, music video in a rawn chhilh zui leh chiah bawk.
Gomez chuan hemi chungchang a sawinaah, ‘Kan in date na hmasa ber chu Sunset Blvd-ah a ni a, kan hla tur pawh hi a thupuiah kan hmang nghal, amah nen ngei kan rawn tichhuak dawn e,’ tiin a video chhuah hma hian a sawi zeuh a ni.
An album thar hi March ni 21 hian tihchhuah an tum a, heta hla awm turte zinga pahnih ‘Scared of Loving You’ tih leh ‘Call Me When You Break Up’ tihte chu single an lo tichhuak tawh bawk.