Aizawl: Zoram Research Foundation leh Research, Innovation & Extension Cell, IQAC, Govt. Aizawl College tangkawp chuan Ningani khan Govt. Aizawl College Conference Hall, Mualpuiah Artificial Intelligence chungchang zirhona, ‘Worshop on Artificial Intelligence Awareness’ an nei a. Workshop hi IFFCO TOKIO General Insurance puihnaa neih a ni.
He hun hi Lalramsanga Sailo, IRS, Secretary, Govt. of Mizoram, Sport & Youth Services chuan khuallian niin a hmanpui a. Prof. Vanlalringa Bawitlung-in kaihruaiin, college Principal Lalbiakzuala’n inlawmna hun a hmang a, IFFCO TOKIO General Insurance atangin Lalrinsanga’n thusawina hun a hmang bawk.
Khuallian chuan tunlai khawvelah AI hmang tangkai a tulzia a sawi a. Sorkarin AI chungchanga hma a lak dante a tar lang a. College zirlaite chu engtiangin nge AI hi eizawnna atan an hmang tangkai theih ang tih ngaihtuah turin a fuih a, zirhona hi hlawk tak a hmang turin a chah a ni.
He zirhona hunah hian Esther Lalremruati, MF&AS, FAO, ICT Department chuan ‘Tunlaia AI hmasawnna leh a lo dawn sawn dan tur’ tih thupui hmangin a zirtir a pe a. Dr Lalthlamuana, ICT-a chief informatics officer ni thin chuan ‘Kum 2025-a ICT hmasawnna leh AI hmanga inrelbawlna’ chungchangte zirtirna hun nei bawk a. Zawhna leh chhanna hun tha tak hman a ni bawk.
AI zirhonaah hian Govt. Aizawl College zirlai leh zirtirtute an tel a ni.