Chief Minister Lalduhoma chuan Assam Rifles (AR) chhuahsan ram hi British hun laia an ram atana pek daih tawh a nih avangin helaia hmun neitute pawhin court-a thu kal mekte hnuk kir thei se an duh tih a sawi.
Ningani khan ZPM General Headquarters buatsaihin AR ram chhuahsan avanga Pathian hnena lawmthu sawina hun, Vanapa Hall-ah hman a ni. Chief minister chuan thu sawiin an sorkar atanga thla thumna, February 20, 2024-a AR Lammualah State Day of Prayer an hman tumin Pathian hnenah AR ram hi an dil a. Hemi hnu hian sorkar laipui hruaitute dawrin Mizoram sorkara a kaihhnawih department hrang hrangte leh AR hotute nen meeting an nei a. Amaherawhchu, an tanna ngai ve veah an tang a, hmasawnna hmuh tur a awm lo tih a sawi.
Chief minister chuan ngaihtuahna thar puin Delhi-ah an tlan khalh tih sawiin, Prime Minister Narendra Modi nen sawi dun lehin, Defence Minister Rajnath Singh bakah Chief Of Army Staff leh AR DG ni mekte pawh an sawipui a. Hemi hnu hian union home minister hmu lehin August 25, 2024-ah AR DG thar, Gen. Vikas Lakhera chuan a bangla-ah tlawhin sawi dun lehin AR hmunhmate an fang dun tih a sawi a, “Chuta tang chuan inthian thatna hmangin hmasawnna kan hmu chho ta hret hret a. An ram chhuahsan tur chinah erawh thu inchuh kan nei zeuh zeuh na a, ka thawhpuiten thahnemngai takin hma an la zel a, Pathian hruainain vawiin hi kan lo thleng ta a ni,” a ti.
AR insawn chhuah chungchangah sorkar hmasate pawhin thui tak kawng an lo sial tawh a, an hmalakna fakawm an tih thu leh lawmthu an sawi tih sawiin chief minister chuan, “He mi ram chhunga ram nei mi 13-in vantlang tan an ram an pe hi thinlung takin lawmthu kan sawi a. Chutih rualin, court-a sorkar khing mek 11 an awm a, he ram hi British hun laia AR ram atana pek daih tawh a ni a. Chuvangin helaia hmun neitute pawhin Pathianin helai hmun hi mipuite tan a pe a ni tih hriaa heng court a thu kal mekte pawh hi hnuk kir thei se kan duh hle a ni,” a ti.
Chief minister chuan AR chhuahsan ram hman dan tur ngaihtuah tur committee an din tawh a, party tin aiawhte pawh an tel dawn a. He committee hi thutawp reltu tur an ni a, NGO lamte pawhin he committee thu hi ngaichang turin a ngen tih a sawi bawk.
ZPM Vice President C. Lalnunnema kaihhruai inkhawmah Revenue Minister B. Lalchhanzova chuan AR ram chhuahsan chungchang report a pe a. He hunah hian Minister leh MLA, Board Chairman, AMC Corporator te leh ZPM General Headquarters hruaitute bakah party mi thahnem tak an tel a ni.