Aizawl: Aizawl East II bialtu MLA B Lalchhanzova’n a bial chhung mipuite dawr theih turin public interview a buatsaih.
Inrinni zing dar 8 atanga dar 11 thleng khan Saron Veng Local Council House-ah bialtu MLA B Lalchhanzova hian a buatsaih a. He hunah hian mi mal leh khawtlang hruaitute’n an mamawhte bialtu MLA hnenah an thlen a, inpawh tawn takin mi mal mamawh leh khawtlang mamawhte an sawi ho a ni.
Supply minister ni bawk, B Lalchhanzova chuan a office leh a chenna in-a pan remchang lote dawr theih tura veng chhung ngei a dawhkan hun hnaih chu a ngaih pawimawh thu sawiin, Armed Veng South-ah hetiang ang hi lo huaihawt tawhin, veng dangah pawh chhunzawm zel a tum thu a sawi a. Mi mal leh khawtlang hruaituten mamawh an thlente pawh a theih chin chinah tihhlawhtlin zel a tum thu a sawi.
B Lalchhanzova hian Saron veng Health Sub-Centre building thawm that ngai laite a tlawh bakah, Anganwadi Centre II chei that lai mek leh hmasawnna hnathawh tura ruahman lai mekte a tlawh nghal a, Bazar Bungkawn atanga Chite veng kawng bumboh tak pawh siam that thuai a nih theih nan PWD lamah a bawhzui reng thu a sawi bawk.