MPCC Treasurer Dr Lalmalsawma Nghaka chuan Adviser to Chief Minister (Hand Holding) Dr KC Lalmalsawmzauva’n sorkarin a intiamna anga hmunphiah lei zo vek tawh anga a sawi chu lungchhiatthlak a tih thu sawiin thu dik lo sawiah a puh.

Inrinni khan Aizawl South II Congress Block, ITI Unit-te a tlawhnaah thu sawiin Dr Lalmalsawma Nghaka chuan Adviser to Chief Minister (Hand Holding) Dr KC Lalmalsawmzauva’n a pisa ngeiah sorkarin a intiamna angin hmunphuah a lei zo vek tawh anga a sawi chu lungchhiatthlak a tih thu sawiin, “Hmunphiah an lei zawh vek lohzia hrechiangtu kan ni a, hmunphiah a that vanglai, a keh hun lai leh hralh chhuah hun laiin sorkarin a leisak thei lo va, tlai khaw hnuah ZOHANDCO kaltlangin eng emaw zat Rs. vaibelchhe 6 man vel lei turin sorkarin ruahmanna a siam a. Sorkarin a intiamna anga kg-ah Rs 100-a laksak lo vin, kg-ah Rs 80-in an leisak ta a ni,” a ti.

Dr Lalmalsawma Nghaka chuan hmunphiah leina tura dah sumte hi ZOHANDCO-in a la hman zawh loh thu leh a hman zawh lohna chhan pawh hmunphiah season lo laiin sorkarin leisak a tum vang a nih thu a sawi.

MPCC treasurer chuan ZPM hotute chu Mizoram dung leh vanga hmunphiah hmun awmnaahte kalchilhin pisa changkang atanga thlir ringawt lovin, an party mite pawh thil awm dan zawt chiang se a duh tih a sawi a. Sorkarin a lei zawhsak vek leh vek loh leh hmunphiah chingtuten harsatna an tawh nasatziate pawh hi a hmunah ngei kalin enfiah se a duh tih sawiin, “Hetianga kut hnathawktute tham lo tak leh hmusit taka lei zawhsak vek anga an sawi hi a pawi kan ti hle,” a ti.

ZOHANDCO kaltlangin quintal 2,500 chuang hralh a ni tawh – ZPM thalai

ZPM Thalai chuan hmunphiah lei tura Mizoram sorkarin a ruat, ZOHANDCO kaltlangin quintal 2,508.29 hralh a nih tawh thu an sawi.

Thuchhuah an siamah ZPM |halai chuan, Mizoram sorkar flagship programme Hand Holding Policy hnuaia thlai thar pali a tarlan zingah hmarcha leh aieng chu sorkar inrawlh ngai lovin, kuthnathawtuten an hralh zo thei niin an sawi a. Report hrang hrang atangin hmarcha ro bik chu kuthnathawktuten quintal 4,000 bawr vel an hralh tawh a. Hmunphiah erawh ZOHANDCO kaltlangin quintal 2,508.29 hralh a ni tawh a, empannelled buyer leh non-empanneled buyer atangin quintal 46,094 lei tawh niin an sawi.

ZPM Thalai chuan Agriculture Minister PC Vanlalruata leh Adviser to CM (Hand Holding) Dr. KC Lalmalsawmzauva kaihhruana hnuaiah Mizoram Agriculture Marketing Board (MAMB) hian a thawh hnihna atan sawhthing lei runpui a kalpui leh mek tih an sawi a. Secondary Collection Centre leh Sairang Buffer Stock Point-ah te hian auction kalpui a ni a nih thu leh ni tin heng SCC leh Sairang Godown atang hian a hlawmin sawhthing hralh chhuah reng a nih thu an sawi.

ZPM Thalai chuan Mizoram tlawha zin, Union Ministry of Agriculture Welfare-a Jt Secretary Samuel Praveen Kumar-a’n MAMB-in kuthnathawktute sawhthing a lei khawm leh hralh chhuah mekna, Sairang FCI Buffer Stock Point chu Inrinni khan a tlawh a. Agrilculture Infrastructure Fund enkawltuin Mizoram sawhthing dinhmun, a quality leh sorkarin a buaipui dan a hmunah ngei a tlawh chu lawmawm an tih thu an sawi bawk.