- Piani Hmar
Eng nge maw Issue awm apianga “a serh zinga mei” ang riaka lo rak nih hi a hmeithai thlak viau mahna!
“Keini zawng kan hmuh leh hriat te sawi lovin kan awm thei lo a ni” tih thupui vuantu Vàu vau loh leh hmeichhia ni nafam khawnge ka’n ri leh hluai ang e!
Zah ah lu em a chhum nang.
TBCC atanga kan unau tamtak an chhuah tàk te nun kha engtin ni zel ang maw?
Tu mawh nge? Chung zawng aichuan, khawi nge an pan tak?
Ka chhuah leh vah velna ah mu thlu lawp lawp, hnathawh hah vang ni lova chau ngawih ngawih hmel pu, kun ngawih ngawih te, meng mang lova meng te, mumang nuam tak mang ang maia chhing duar duar hmel te ka hmu fo ta mai.
Pahnih ka hmuh te phei kha chu an la naupan hmel sia e, kei nu fahring tawh thinlung hi a rûm kàwk kâwk asin, tih sak theih lah ka nei lo nasa mai si.
Heng kan vela mihring, minung ve satliah te tan hian eng nge ka tih ve theih ang aw!
Thenkhat phei chu pan leh belh tur nei tawh lo te an ni an la ti ta deuh deuh!
Diktak chuan, an chhungte pawn an duh tawh loh (duh tawh loh tih chu a mawi chiah lo) an enkawl that theih tawh lo te an ni a, beiseina nen, taksa leh thlarau damna an chan ngei theihnan, an tana hmun him leh tha bera an rinna hmunah mittui nen an thlah liam tak kha an ni a.
Engtin ni zel ang maw?
Sualin a bawih, sual do zo tawh lo, an thinlung chuan that duhna neiin sim duh mah se, an taksa in a phût leh ngen tlat tawh avanga an mamawh tlat tawh nia inhria pangngai lohna chu an tan pangngaina alo ni ta a, an danglam deuh hmaa mi pangngai pha lo ni ta tlat te dinhmun hi ka ngaihtuah fo thin.
Anmahni tan hian engtia enkawl nge tha ber ang tih hi mithiam ka ni lo a ka hre hek lo. Hei erawh ka hriatpui, hrehawm an ti ve hle ang tih chauh hi.
Ni e, That chhuah ngei duhna leh tumna nen, an chhungte pawn an dah a, chhungkaw khat tan pawh mipakhat ngawlvei enkawl a har tur zia hi, mi tamtak chuan an hria ang.
Mahni hrin leh Thisen ngei lakah pawh dawhtheih reng a har dawn laia a sawm leh za tel, mize hrang leh Thisen hrang daih han enkawl kha chu thil awlsam leh nuam tak ani hauh lo ang tih zawng kan hrethiam ngei ang.
Khauh lutuk a dik lo ang a, ném leh zaidam lutuk lah ani ber dawn si lo, mihring ve lo, tlin leh theih chin nei, thlarau-a khat reng tan lo chuan thil tih theih rual ani hauh lo ang le!
Ringtu nun lah par lem ( Artificial )anga par reng leh duah hluah reng theih ani dawn si lo!
Beidawn rawih rawih chang ava tam dawn em!
Ngawlvei pahnih thum chu sawi loh pakhat buaipui pawh kei ang hi chuan ka huphurh satliah lo, enkawltu ni tura inpek te hi ka ngaihtuah ngam thlawt lo a ni.
Ngawlvei 5 chauh , chhungte pawn an siamthat theih tawh loh enkawl a, an chênna tur In pe tur leh va buaipui hauh lo pawha an riahna tur In pakhat luah tir pawh kan thei ngût emaw chu!
A awm sa thiah leh a awm te, an duh ang anga tal pawl tura chhuah zalen hi thil tha ber a ni em tih te ka ngaihtuah a ni.
Enkawlna tha leh kalphung, kal dan dik zawk an neih dan kawng dap a, kawhhmuh tur hre hawt si lova lo dem chiam mai te hi a finthlak ber em?
Pan tur chhungte nei tawh lo tamtak tan zankhat lek pawh ka lo mikhual thei em? Ka lo mikhual duh chiah em tih te ka ngaihtuah thleng zel a, a nghawng tur ngaihtuah hauh lo leh a invenna tur, siamthat dan tur lam thlir tel hauh lova a ti chhetu leh, paih darhtu nih zawng thil dik ber ani meuh em le?
TBCC ah hian Pathian khawngaihna zar chauhin ka chhung leh laina an la awm ve lo a, a thatna leh that lohna sawi tur ka hre lo, hei erawh ka hria, heng kan unaute enkawlna tur din duh khawpa thinlung ropui putu hi kei hi chuan ka fak a, hengte tana inpea thawktu te hi ka zah em em a ni.
‘,Heng mi tê ber chunga i tih hi ka chunga ti i ni” ti tu kan Pathian zawk hi lawmman petu tur leh tehtu tur a ni.
Lam lian leh daia vakvaia, a riltam leh mamawh phuhruk nana arem apiang dap tura an nun thlah zalen ani ta hi kan la tuar dawn chauh nge?
Heng thu ah hian, sawrkar leh pawl, KOHHRAN hian hma la in, ruahmanna tha zawk a rawn kalpui dawn em tih chu lo thlir zel phawt ila, ka theih tawk tawngtaina erawh an tan bang lovin lo hlan mai ang aw.