Liverpool forward Diogo Jota chu kum 28 mi niin car chesualah a thi.
Portugal forward hi Spanish province, Zamora-a chetsualna thlengah hian a nau, Andre Silva pawh a thi a ni.
Kum 25 mi hi a u ang bawka professional footballer niin Portuguese second division club Penafiel-a khel mek a ni.
Guardia Civil chuan Jota leh a nau hi Ningani zing dar 12:30 velah an thi niin an sawi.
An Lamborghini car hmanga lirthei dang lehpelh an tum laiin a ke a puak a, kawng atanga tlan chhuakin a alh zui ta a ni.
Jota hian ni 11 lek liam taah khan rei tak a lo kawp tawh, Rute Cardoso nen an inkutsuih chauh va, fa pathum an nei tawh.
Social media-ah pawh June 22-a an inneih inkhawm thlalak chu a dah chhuah hnuhnung pawl a la ni.
Liverpool chuan Wolves atanga £ maktaduai 41-a kum 2020-a an lak luh, Jota an chân ta chu ‘hrehawm nasa tak’ tiin an sawi.
Reds tana vawi 182 a khelh tawhah goal 65 a thun tawh a, kum 2022 khan FA Cup leh League Cup a lakpui a, season liam ta chiahah khan Premier League-ah a champion-pui bawk.
Jota hian kum 2017 khan Atletico Madrid atangin Wolves a zawm a, a ngheta a luh hmain season khat chhung loan-in a khelhsak hman bawk a. Season thum chhungin vawi 131 inlanin goal 44 a thun hman a ni.
“Kan rilru a na tak zet,” tiin Wolves hian thu an chhuah a. “Diogo hi min tantuten an tan a, a khelhpuite pawhin an ngaina a, a bula awmte a tihlim em em zel thin,” an ti.
“Hnuhma kan lo neih tawhte chu hriat reng a ni tawh ang a. A chhungte, a thiante leh amah hmangaihtute kan tawrhpui tak zet a ni,” an ti.
Jota hi kum 2019 atangin an ram tan a inlan tan a, Portugal tana a inkhelh hnuhnung ber chu June 8-a Uefa Nations League final-a Spain an hneh kha a ni ta a. An ram tan hoal vawi 49 a inlanah goal 14 a thun hman a ni.
“Portuguese Football Federation (FPF) leh Portuguese football chuan hrehawm a ti tak zet a ni,” tiin FPF chuan thu an chhuah.
“Player ropui tak a nih piah lamah Diogo Jota hi mi tha chungchuang a ni a, a khelhpui leh a hmachhawnte pawh a zah em em vek a, mi tihlim thei leh a awmna hmun apiang nuam taka siam thei zel a ni,” an ti.
“Champion pahnih kan chân a. Diogo leh Andre Silva te hi Portuguese football tan an aiawh zo awm lo tur an ni a, an hnuhma hi ni tin kan hre thar zel dawn a ni,” an ti.
Uefa chuan Jota te unau sun nan Euro 2025-a Portugal-in Ningani zana Spain an hmachhawnah minute khat sunna hun an hmang bawk.